BAKI,VOA, Nailə Babazadə

Səudiyyə Ərəbistanı zorakılığın bütün formalarını qəti şəkildə rədd edir.

VOA xəbər verir ki, bu bəyanatla Krallığın Xarici İşlər Nazirliyi çıxış edib.

Rəsmi Riyad Livanın cənubunda Birləşmiş Millətlər Təşkilatının Livandakı Müvəqqəti Qüvvələrinin (UNIFIL) tərkibindəki Fransa kontingentinə qarşı törədilən və bir əsgərin ölümü, bir neçəsinin yaralanması ilə nəticələnən hücumu kəskin şəkildə pisləyib.

Nazirlik tərəfindən yayılan rəsmi bəyanatda vurğulanıb ki, bu növ hücumlar, xüsusilə onların təkrarlanan xarakter alması fonunda mütləq şəkildə cəzalandırılmalı və məsuliyyət daşıyanlar qanun qarşısında cavab verməlidirlər. Səudiyyə Ərəbistanı UNIFIL missiyasına dəstəyini ifadə edərək, Fransa hökumətinə və xalqına başsağlığı verib, yaralıların tezliklə sağalmasını arzulayıb.

Xatırladaq ki, hadisə Livanın cənubunda yolun təmizlənməsi zamanı baş verib. UNIFIL və Fransa rəsmilərinin verdiyi məlumata görə, hücum nəticəsində bir fransız əsgəri həlak olub, üçü isə yaralanıb (onlardan ikisinin vəziyyəti ağırdır). Rəsmi Paris bu hücumun böyük ehtimalla İran tərəfindən dəstəklənən "Hizbullah" qruplaşması tərəfindən törədildiyini bildirib.

Fransa Prezidenti Emmanuel Makron Livan Prezidenti Cozef Aun və Baş nazir Nəvaf Səlam ilə keçirdiyi telefon danışıqlarında bu hadisəni "qəbulolunmaz hücum" kimi qiymətləndirərək pisləyib.