BAKI,VOA, Nailə Babazadə

İsrailin "Haaretz" qəzetinin yaydığı məlumata görə İsrail ordusu son dövrlərdə Livanın cənubunda və sərhəd xətti boyunca əlavə hərbi məntəqələr yaradıb.

VOA xəbər verir ki, ötən ay quru işğalına yenidən başlayan İsrail ordusu 2024-cü ildəki atəşkəsdən sonra Livan ərazisində qalan 5 strateji nöqtəni nəzarətdə saxlamağa davam edir. Şahidlərin ifadələrinə istinadən hazırlanan xəbərdə İsrailin Livan torpaqlarında qurduğu hərbi postların sayının iki qat artacağı gözlənilir.

Hərbçilər xəbərdarlıq edir ki, bu nöqtələr "Hizbullah" ilə daimi qarşıdurma mərkəzlərinə çevrilə bilər və raket hücumları, həmçinin dron zərbələri üçün hədəf ola bilər.

İsrail ordusu hər nə qədər "daimi təhlükəsizlik zonası" planının olmadığını iddia etsə də, ərazidəki fəaliyyətlər fərqli mənzərə yaradır. Litani çayının 20 kilometr cənubuna qədər irəliləyən bölmələr Livan kəndlərində binaları uçuraraq təmizləmə işləri aparır. Qəzetə danışan israilli hərbçilər Livanın cənubundakı vəziyyəti Qəzza zolağındakı dağıntılarla müqayisə ediblər. Bildirilir ki, texnika və buldozerlər vasitəsilə binalar məhv edilir və muvəqqəti deyil, uzunmüddətli istifadə üçün nəzərdə tutulan mövqelər qurulur. Livan hökuməti isə hücumlar nəticəsində didərgin düşən insanların sayının 1 milyon 162 min nəfəri keçdiyini bəyan edib.