BAKI,VOA, Orxan Qədirzadə

Gəmilərin izlənilməsi sistemlərindən (ship-tracking) əldə edilən məlumatlara görə, Qətərin "Ras Laffan" limanından maye qaz (LNG) yüklənmiş iki iri tankeri Hörmüz boğazı istiqamətində hərəkət edərkən qəfil kursunu dəyişərək geri dönüb.

VOA xəbər verir ki, ekspertlərin rəyinə görə, əgər bu gəmilər boğazı uğurla keçsəydi, bu, cari ilin 28 fevralında ABŞ və İsrailin İrana qarşı hərbi əməliyyatlara başlamasından bəri maye qaz yüklərinin sözügedən su yolu vasitəsilə ilk tranziti olacaqdı. "Kpler" və "LSEG" analitik şirkətlərinin məlumatları göstərir ki, "Al Daayen" və "Rasheeda" adlı tankerlər yüklərini fevralın sonunda qəbul ediblər.

Məlumatda həmçinin qeyd olunur ki, "Al Daayen" tankeri hazırda Çin istiqaməti üçün siqnal ötürür. Hər iki gəminin "QatarEnergy" şirkətinin nəzarətində olduğu bildirilir. Mövcud vəziyyətlə bağlı "QatarEnergy" hələlik rəsmi şərh verməyib. Qeyd edək ki, bölgədəki hərbi-siyasi gərginlik enerji daşıyıcılarının təhlükəsiz daşınması məsələsini yenidən gündəmə gətirib.