BAKI, VOA, Orxan Qədirzadə

"Hizbullah" hərəkatının rəhbəri Naim Qasim İsrail ordusunun Livana qarşı həyata keçirdiyi hava və quru əməliyyatları fonunda ölkədə milli birliyə çağırıb. Çərşənbə günü verdiyi bəyanatda Qasim İsrailin hücumlarına qarşı "limit tanımadan" mübarizəni davam etdirəcəklərini vurğulayıb.

VOA xəbər verir ki, Naim Qasim Livanın hazırda iki seçim qarşısında olduğunu bildirib: "Ya torpaqlarımızdan imtina edib təslim olmalı, ya da qaçılmaz müqaviməti seçməliyik".

Qasim rəsmi Beyrutun İsraillə birbaşa təmas qurmaq cəhdlərinə və beynəlxalq vasitəçilik təkliflərinə sərt reaksiya verib:

"Atəş altında düşmənlə danışıqlar aparmaq Livana təslimçiliyi diktə etmək və ölkəni müdafiə imkanlarından məhrum etməkdir".

"Hazırkı mərhələdə yeganə hədəf İsrail-ABŞ təcavüzünü dayandırmaq, torpaqları və xalqı azad etməkdir. Digər bütün məsələlər sonra müzakirə oluna bilər".

Xatırladaq ki, 28 fevral 2026-cı ildə ABŞ və İsrailin İrana qarşı başlatdığı müharibədən sonra, mart ayının əvvəlindən etibarən "Hizbullah"ın İsrail ərazilərinə raket zərbələri endirməsi ilə Livan cəbhəsində gərginlik pik həddə çatıb.

İsrailin hücumları nəticəsində Livanda 1072-dən çox insan həlak olub, 1,2 milyondan çox sakin evlərini tərk etmək məcburiyyətində qalıb.

İsrail ordusu "Hizbullah" infrastrukturunu məhv etmək məqsədilə Livan ərazisinin dərinliklərinə doğru quru əməliyyatlarını genişləndirib.

İsrailin maliyyə naziri Bezalel Smotriç kimi ultra-sağçı siyasətçilər Livanın cənubunun ilhaq edilməsi çağırışlarını ediblər ki, bu da Fransa prezidenti Emmanuel Makron başda olmaqla dünya liderləri tərəfindən kəskin pislənilib.

Livanın rəsmi hökuməti "Hizbullah"ın hərbi fəaliyyətini qanundankənar elan etdiyini və İsraillə birbaşa danışıqlara başlamaq istədiyini bəyan etsə də, İsrailin müdafiə naziri İsrail Katz İsrailin şimalı tam təhlükəsiz olana qədər cənubi livanlıların evlərinə qayıda bilməyəcəyini vurğulayıb.