BAKI,VOA, Nailə Babazadə

İraqın Baş naziri Məhəmməd Şia əl-Sudani bazar ertəsi İtaliyanın "Corriere Della Sera" qəzetinə verdiyi müsahibədə ABŞ-ın rəhbərlik etdiyi anti-İŞİD beynəlxalq koalisiyasının fəaliyyətinə xitam verilməsi prosesini sürətləndirəcəyini bildirib.

VOA xəbər verir ki, baş nazirin bu açıqlamaları İraqın öz iradəsi xaricində Yaxın Şərqdəki münaqişəyə sürükləndiyi bir vaxta təsadüf edir. Xatırladaq ki, bu münaqişə fevralın 28-də İsrail və ABŞ-ın İrana zərbələr endirməsi ilə başlayıb. Həmin tarixdən bəri İranyönümlü silahlı qruplaşmalar İraqda və regionda ABŞ-ın maraqlarına qarşı demək olar ki, hər gün hücumlar təşkil edir.

Beynəlxalq koalisiyanın missiyasının başa çatması ilkin olaraq 2026-cı ilin sentyabr ayına planlaşdırılmışdı. Lakin Sudani müttəfiqlərlə birlikdə bu müddəti önə çəkməyə qərar verdiklərini vurğulayıb.

"İraq torpaqlarında xarici hərbi kontingent qalmadıqdan sonra ölkədəki silahlı qruplaşmaları tərksilah etmək daha asan olacaq." - deyə Sudani qeyd edib.

Baş nazir bu addımın ölkədəki İranyönümlü qruplaşmaların silah arsenalını ləğv etmək və dövlətin silah üzərində inhisarını təmin etmək üçün mühüm olduğunu qeyd edib. Silahlı qruplar öz mövcudluğunu xarici əsgərlərin ölkədə olması ilə əsaslandırırdılar.

Hazırda koalisiya qüvvələrinin hərbi məsləhətçiləri yalnız İraq Kürdüstanı bölgəsində yerləşirlər. Yanvar ayında geriçəkilmə razılaşmasının birinci mərhələsi tamamlanıb və heyət İraqın hərbi bazalarını tərk edib. Koalisiya qüvvələri həmçinin qonşu Suriyadakı bazalarını da Suriya hökumət qüvvələrinə təhvil verərək geri çəkilməkdədir.