BAKI, VOA, Orxan Qədirzadə
İsrail hökumətinin Qüdsdə silahlanmanın genişləndirilməsi ilə bağlı qərarı regionda yeni gərginlik müzakirələrinə səbəb olub.
VOA xəbər verir ki, İsrailin milli təhlükəsizlik naziri İtamar Ben-Qvir Qüdsdə əlavə 41 yəhudi məhəlləsinin sakinlərinə şəxsi odlu silah saxlamaq üçün lisenziya verilməsi barədə qərar qəbul edib.
Bu qərar nəticəsində Qüdsdə yaşayan 300 mindən çox yəhudi sakinin silah əldə etmək hüququ yaranacaq.
Qərar əvvəllər silah əldə etmiş Qüds sakinləri ilə birlikdə şəhərdə yaşayan yəhudilərin böyük hissəsinin silah lisenziyası almaq imkanına malik olacağı anlamına gəlir. Məlumata görə, Qüdsdə təxminən 600 min yəhudi yaşayır.
Silahlanma proqramı İsrailin Qəzza zolağına qarşı hərbi əməliyyatlarının başlanmasından sonra 2023-cü ilin sonunda genişləndirilib və həmin dövrdən bəri 250 mindən çox israilli silah əldə edib.
Yeni qərar çərçivəsində silah əldə etmək hüququ təkcə məskunlaşma məntəqələrində yaşayanlara deyil, həm də dini icmaların üzvlərinə və hərbi xidmət keçməmiş şəxslərə də şamil oluna bilər.
Qərara Qüdsün müxtəlif bölgələrində yerləşən məhəllələr, o cümlədən ultra-ortodoks icmaların yaşadığı ərazilər və ərəb məhəllələrinə yaxın zonalar daxil edilib.
Eyni zamanda qərar fonunda İordan çayının qərb sahilində məskunlaşan yəhudi qruplarının hücumlarının artdığı bildirilir. Son iki gün ərzində baş verən hücumlar nəticəsində altı fələstinlinin öldürüldüyü qeyd olunur.
Fələstin rəhbərliyi isə bu qərarı kəskin tənqid edərək onu təhlükəli addım və irqçi təhrik kimi qiymətləndirib. Fələstin tərəfi beynəlxalq ictimaiyyəti mülki əhalinin qorunması üçün təcili tədbirlər görməyə çağırıb.