BAKI,VOA

Qətər Dövlət Təhlükəsizlik Xidməti ölkənin daxili təhlükəsizliyinə qarşı fəaliyyət göstərən və İranın İslam İnqilabı Keşikçiləri Korpusuna (SEPAH) bağlı olan iki mütəşəkkil şəbəkənin zərərsizləşdirildiyini elan edib. Qətər Rəsmi Xəbər Agentliyinin (QNA) yaydığı məlumata görə, bu şəbəkələr Dohada həssas obyektlərə qarşı kəşfiyyat və təxribat fəaliyyətləri planlaşdırırmış.

Dövlət Təhlükəsizlik orqanlarının həyata keçirdiyi uzunmüddətli izləmə və texniki monitorinq əməliyyatları nəticəsində 10 şübhəli şəxs saxlanılıb. Şəbəkə üzvləri arasında vəzifə bölgüsü aşağıdakı kimi müəyyən edilib:

Casusluq qrupu: 7 nəfər Qətərin strateji infrastrukturu barədə məlumat toplamaq və kəşfiyyat hesabatları hazırlamaqla vəzifələndirilib.

Təxribat qrupu: 3 nəfər ölkədə asayişi pozmaq və hədəf alınan nöqtələrdə birbaşa təxribat törətmək üçün cəlb edilib.

Hərbi təlimlər: Saxlanılan şəxslərin SEPAH tərəfindən pilotsuz uçuş aparatlarından (PUA) istifadə və dronlarla hədəfləri vurma mövzusunda xüsusi təlim keçdikləri təsdiqlənib.

Əməliyyat zamanı şəbəkə üzvlərinin gizləndiyi məkanlardan xeyli sayda maddi sübut ələ keçirilib. Qətər rəsmiləri bildirirlər ki, müsadirə edilən avadanlıqlar arasında ölkədəki həssas və strateji obyektlərin dəqiq coğrafi koordinatları,yüksək texnologiyalı rabitə vasitələri və gizli yazışma cihazları və təxribat məqsədilə istifadə edilməsi planlaşdırılan texniki avadanlıqlar.

Qətər Dövlət Təhlükəsizlik Xidməti ölkənin suverenliyini və daxili sabitliyini hədəf alan hər hansı bir cəhdə qarşı qətiyyətli mübarizəni davam etdirəcəyini vurğulayıb.