BAKI, VOA, Nailə Babazadə

Səudiyyə Ərəbistanının Həcc və Ümrə Nazirliyi builki illik Həcc ziyarətini yerinə yetirmək istəyən daxili zəvvarlar üçün qeydiyyatın başladığını elan edib.

VOA xəbər verir ki, rəsmi qurumun çərşənbə günü verdiyi məlumata görə, krallıq daxilində yaşayan şəxslər müraciətlərini "Nusuk" mobil tətbiqi və ya nazirliyin rəsmi internet saytı vasitəsilə həyata keçirə bilərlər. Builki qeydiyyat prosesində əsas üstünlük daha əvvəl Həcc ziyarətində olmayan şəxslərə veriləcək.

Ziyarətə qatılmaq istəyən namizədlər üçün müəyyən yaş və sağlamlıq kriteriləri tətbiq olunub. Qaydalara əsasən, müraciət edənlərin yaşı ən azı 15 olmalıdır. Krallıqda yaşayan əcnəbilər üçün isə etibarlı yaşayış icazəsinin (iqamə) olması şərtdir. Bu kateqoriyada bir ildən çoxdur krallıqda yaşayan şəxslərə üstünlük tanınacaq.

Nazirlik zəvvarların sağlamlıq vəziyyətinin yerində olmasını və ağır xroniki və ya yoluxucu xəstəliklərdən əziyyət çəkməməsini tələb edir. Bundan əlavə, ziyarətə icazə almaq üçün meningit və mövsümi qripə qarşı peyvənd olunmaq icbaridir.