BAKI,AzerVoice, Nailə Babazadə

Suriya ordusu SDQ terror təşkilatının hücumlarına qarşı Hələbdə məhdud hərbi əməliyyat başladacağını açıqladı. Hələbdə Suriya ordusu qüvvələri ilə 10 mart tarixli razılaşmanı pozan SDQ terror təşkilatı arasında toqquşmalar davam edir.

AzerVoice xəbər verir ki, Suriya Rabitə Nazirliyi məsələ ilə bağlı açıqlama yayıb.

Bəyanatda Suriya Ərəb Ordusunun SDQ terror təşkilatının davam edən hücumlarına cavab olaraq Hələbdə məhdud hərbi əməliyyat başladacağı bildirilib.

Nazirlik Hələbdəki əməliyyatın məqsədinin pilotsuz təyyarə hücumlarını dayandırmaq, təhlükəsizliyi təmin etmək, Hələb-Əzəz yolunu yenidən açmaq və mülki şəxsləri qorumaq olduğunu vurğulayıb.

Suriya ordusu Hələbdə yaşayan mülki şəxslərin təxliyəsi üçün saat 15:00-a qədər vaxt vermişdi. Lakin təxliyələrin başa çatdırılmaması səbəbindən əlavə bir saat vaxt verilib.

Suriya Ordusu həmçinin bildirib ki, SDQ terror təşkilatı Şeyx Məqsud və Əşrəfiyyə məhəllələrini tərk etmək istəyən mülki şəxslərin humanitar dəhlizə çatmasına mane olur.

30 gün ərzində SDQ terror təşkilatının hücumları nəticəsində 20 mülki şəxs və 25 əsgər həyatını itirib.