BAKI, AzerVoice, Nailə Babazadə

İsrail döyüş təyyarələri Livanın cənub və şərqində yerləşən bir sıra ərazilərə hava hücumları həyata keçirib. Hücumlar İsrail ilə Livan arasında 27 noyabr 2024-cü ildə əldə olunmuş atəşkəs razılaşmasına baxmayaraq davam edir.

AzerVoice xəbər verir ki, İsrail təyyarələri ölkənin şərqində Baalbek şəhərinin qərbində yerləşən Bavadi qəsəbəsinin ətrafını və Hermel bölgəsinin kənd ərazilərində yerləşən Zagrin məntəqəsini hədəfə alıb.

Cənub bölgəsində isə Deyr Seryan və Kasir qəsəbələrinin yerləşdiyi ərazilər, Zotar qəsəbəsi, Cizzin bölgəsindəki Reyhan təpələri, həmçinin Curet Hudur, Katrani və Kefr Huna ətrafına hava zərbələri endirilib.

Sosial şəbəkələrdə yayılan görüntülərdə vurulan bir çox nöqtədən qalın tüstünün qalxdığı müşahidə olunur. Livan rəsmiləri hücumlar nəticəsində ölən və yaralananlar barədə hələlik məlumat açıqlamayıb.

İsrail ordusu yaydığı yazılı bəyanatda Livanın cənub və mərkəzi bölgələrində çoxsaylı hədəflərə hava zərbələri endirdiyini təsdiqləyib. Açıqlamada, “Hizbullaha məxsus silah anbarları və hərbi infrastrukturlar da daxil olmaqla bir çox obyektin vurulduğu” bildirilib.

Qeyd edək ki, İsrail 2023-cü ilin oktyabrında Livana qarşı hücumlara başlayıb, 2024-cü ilin sentyabrında isə bu hücumlar genişmiqyaslı müharibəyə çevrilib. Münaqişə nəticəsində 4 mindən çox insan həlak olub, təxminən 17 min nəfər yaralanıb.

27 noyabr 2024-cü ildə atəşkəs razılaşması əldə olunsa da, İsrailin bu razılaşmanı minlərlə dəfə pozduğu bildirilib. İsrail 8 oktyabr 2023-cü ildən sonra Livanda ələ keçirdiyi beş təpəni hələ də işğal altında saxlayır, həmçinin onilliklərdir nəzarətində olan bəzi bölgələrdə mövcudluğunu davam etdirir.

Livan Səhiyyə Nazirliyinin məlumatına görə, İsrailin atəşkəsi pozaraq 27 noyabr 2024 – 27 noyabr 2025 tarixləri arasında həyata keçirdiyi hücumlar nəticəsində 335 nəfər ölüb, 973 nəfər yaralanıb.