BAKI, AzerVoice, Nailə Babazadə
Livan ilə İsrail arasındakı müzakirələr ABŞ və Avropanın güclü təzyiqləri altında davam edir və tərəflər masaya fərqli prioritetlərlə gəlirlər.
AzerVoice xəbər verir ki, Vatikan Dövlət Başçısı Papa XIV Leo-nun Livan səfərini tamamlamasının ardından, İsrail və Livan 3 dekabrda "Mexanizm" kimi tanınan Atəşkəsi Nəzarət Komitəsinin toplantılarına qarşılıqlı olaraq mülki nümayəndə göndərməyi qərara alaraq müzakirə prosesini yeni mərhələyə daşıyıb.
ABŞ və Avropanın təzyiqi ilə sürət qazanan prosesdə, Livan heyətinə mülki nümayəndə kimi təyin edilən Səfir Simon Keremin səlahiyyətləri və müzakirələrin gündəliyi ətrafında mübahisələr ortaya çıxıb.
Livan Prezidenti Cozef Aun görüşlərdə ölkənin suverenliyindən güzəşt edilməyəcəyini qeyd edərək, Səfir Keremə verilən vəzifənin yalnız "təhlükəsizlik müzakirələri" ilə məhdud olduğunu vurğulayıb. Buna qarşılıq olaraq silahlarını təhvil verməyəcəyini açıqlayan Hizbullahın Baş Katibi Naim Qasım, mülki nümayəndə qərarını “səhv və İsrailin xeyrinə güzəşt” adlandırıb.
Tərəflər masaya fərqli prioritetlərlə gəlir. Anadolu Agentliyinə danışan ekspertlərin sözlərinə görə, İsrail sərhəd xəttini “iqtisadi zona” anlayışı altında təhlükəsizlik səbəbləri ilə yenidən tənzimləməyi hədəfləyərkən, Livan müzakirələrin mərkəzinə davamlı atəşkəs, hücumların dayandırılması və işğalın sona çatmasını qoyur.
Ekspertlər mövcud müzakirə mərhələsinin hər iki tərəf üçün “son dərəcə mürəkkəb və həssas” olduğunu vurğulayaraq, siyasət və iqtisadi məsələlərin iç-içə keçdiyi bu prosesdə, bölgədəki tarazlıqların gələcəkdə əldə olunacaq hər hansı bir razılaşmanın istiqamətini müəyyən etməkdə kritik rol oynayacağını bildirirlər.