BAKI, AzerVoice, Orxan Qədirzadə

Papa XIV Leo bazar günü Livana gəlib. O bildirib ki, səfərin məqsədi müharibə, iqtisadi çətinliklər və sosial gərginliklə üzləşən ölkəyə “sülh və həmrəylik mesajı” çatdırmaqdır. Ziyarət İsraillə Hizbullah arasında bir ildən çox davam edən qarşıdurmanın təsirlərinin hələ də davam etdiyi dövrdə baş tutur.

AzerVoice xəbər verir ki, Papa may ayında dünya üzrə 1,4 milyard katolikin lideri seçildikdən sonra ilk xarici turuna Türkiyə və Livandan başlayıb. O, jurnalistlərə açıqlamasında səfərin əsas mövzusunun “regionda sülhün təşviqi” olduğunu deyib. Beyrut hava limanında Prezident Cozef Aun və digər rəsmilər onu rəsmi mərasimlə qarşılayıblar. Təyyarəyə iki hərbi təyyarə müşayiət edib, limanda uşaqlar və orkestr çıxış edib.

Livanın cənub bölgəsindən gələn bir çox gənc də papa karvanını qarşılamaq üçün yol kənarında dayanıb.

Səfər yeni seçilmiş amerikalı papanın beynəlxalq arenada ilk siyasi sınağı hesab olunur. Türkiyədəki ziyarət sakit keçsə də, Livanın dini müxtəlifliyi və iqtisadi böhran fonunda Beyrut proqramına daha böyük diqqət ayrılıb. Ölkədə altı milyon əhali yaşayır və müxtəlif dini icmalar siyasi sistemdə mühüm rol oynayır. Prezident postunun maronit xristiana məxsus olması da bu bölgünün bir hissəsidir. Miqrasiya səbəbindən xristian əhalinin sayında ciddi azalma müşahidə olunur.

Paytaxtın cənubunda Hizbullahın təsir dairəsində olan ərazilərdə təşkilatın gənc dəstələri papa kolonu üçün təhlükəsizlik məqsədilə ərazidə gözləyib. Səfərdən əvvəl Hizbullah İsrailin Livana qarşı “davam edən hücumlarını” pisləməyə çağıran məktub yaymışdı.

Türkiyə proqramında Papa İznik və İstanbulda keçirilən dini mərasimlərə qatılıb və 1700 il əvvəl keçirilmiş Nikeya Şurasının ildönümünü qeyd edib.

Papanın Livanda 48 saatlıq səfəri zamanı Beyrut sahilində genişmiqyaslı açıq hava ayini də keçiriləcək. Təşkilatçılar mərasimə 120 min insanın qatılacağını bildiriblər.