BAKI,AzerVoice

İsrail ordusu çərşənbə günü bildirib ki, Qəzzənin cənubundan şimala keçmək üçün sakinlərə açıq qalan son yol olan ər-Rəşid küçəsi bağlanacaq. Bu addım ordunun Qəzzə şəhərinə hücumunu davam etdirdiyi bir vaxtda atılıb.

AzerVoice xəbər verir ki, İsrail ordusunun sözçüsü Avihay Adrai “X” platformasında paylaşımında “Cənub bölgəsindən hərəkət üçün ər-Rəşid küçəsi yerli vaxtla saat 12:00-da bağlanacaq. Qəzzə şəhərini tərk edə bilməyənlər üçün cənuba hərəkət imkanı açıq qalacaq. Bu mərhələdə Müdafiə Ordusu cənuba keçidi sərbəst və yoxlamasız şəkildə təmin edir.”-deyə yazıb.

Qeyd edək ki, İsrailin hücumu nəticəsində 52 min 500-dən çox fələstinli həlak olub, Qəzzə zolağının böyük hissəsi dağıdılıb. Hərbi əməliyyatlar HƏMAS - n 2023-cü il 7 oktyabrda İsrailin cənubuna hücumu ilə başlayıb. İsrailin məlumatına görə, həmin hücumda 1200 nəfər öldürülüb, 250-dən çox insan isə girov götürülüb.

Xatırladaq ki, İsrail martın 18-də HƏMAS ilə atəşkəsi bitirərək qəfil hava zərbələri endirib. Bu zərbələr nəticəsində yüzlərlə fələstinli müxtəlif bölgələrdə həyatını itirib. Həmin vaxtdan bəri İsrail Qəzzəyə yardımın daxil olmasına mane olur. Çörək bişirən müəssisələrdə unun, sobaların işləməsi üçün yanacağın tükənmək üzrə olduğu, xəstəxanalarda isə dərman və tibbi ləvazimat çatışmazlığı yaşandığı bildirilir.