BAKI, AzerVoice, Nərmin Ağayeva

ABŞ nümayəndəsinin jurnalistlərə qarşı işlətdiyi ifadə Livanda etirazlara səbəb olub.

AzerVoice xəbər verir ki, ABŞ-ın Suriya və Livan üzrə xüsusi nümayəndəsi və Ankaradakı səfiri Tom Barakın mətbuat konfransında jurnalistlərə qarşı işlədiyi ifadələr ölkədə gərginlik yaradıb.

Beyrutda Livan prezidenti Cozef Aunla görüşdən sonra jurnalistlərin suallarını cavablandıran Barak, “Əgər bu görüş heyvani xaosa çevrilməyə başlasa, gedəcəyik. Mədəni olun” sözlərini işlədib. Bu açıqlama ictimaiyyətdə kəskin etiraza səbəb olub. Livan Prezident Administrasiyası həmin gün bəyanat yayaraq, qonağın söylədiyi ifadələrə görə təəssüf hissi keçirdiklərini bildirib və “insanlığa hörmətin əsas prinsip” olduğunu vurğulayıb.

Livan Jurnalistlər Birliyi Barakdan rəsmi üzr istəməsini tələb edib. Eyni zamanda, Livanın Milli Xəbər Agentliyi (NNA) etiraz aksiyalarının keçirildiyini açıqlayıb. Xiam küçələrinə çıxan insanlar ABŞ-ın İsrailə dəstəyini və Livanın daxili işlərinə müdaxiləsini pisləyərək şüarlar səsləndiriblər. Gərginlik səbəbindən Barak və nümayəndə heyətinin Xiam və Tir şəhərlərinə planlaşdırılan səfəri ləğv edilib.

Qeyd edək ki, ABŞ nümayəndəsinin Livana səfəri regiondakı siyasi və hərbi proseslərlə bağlı məsləhətləşmələrin bir hissəsi kimi nəzərdə tutulmuşdu.