BAKI,AzerVoice

Yəmənin paytaxtı Sənada husilərin nəzarətində olan hərbi məhkəmə, ölkənin keçmiş prezidenti Əli Abdullah Salehin oğlu Əhməd Əli Saleh barəsində qiyabi olaraq edam hökmü çıxarıb və onun bütün əmlak və sərvətinin müsadirə olunmasına qərar verib.

AzerVoice xəbər verir ki, hökm, onu “xəyanət, düşmənə casusluq və əməkdaşlıq”da ittiham edən “Mərkəzi Hərbi Məhkəmə” tərəfindən elan edilib.

Hazırda Birləşmiş Ərəb Əmirliklərinin paytaxtı Əbu-Dabidə yaşayan və Ümumxalq Konqresi Partiyasının sədr müavini vəzifəsini icra edən Əhməd Əli Saleh, husilər tərəfindən uzun müddətdir siyasi hədəfə çevrilib.

Qiyabi hökmə səbəb kimi onun son aylarda beynəlxalq sanksiyalardan azad olunmasından sonra Yəmən siyasi səhnəsində və mediada artan fəallığı göstərilir. Husi nəzarətində olan prokurorluq onu xarici qüvvələrlə əməkdaşlıqda və husilərə qarşı mövqe sərgiləməkdə günahlandırır – bu isə qrupun müxaliflərini susdurmaq üçün tez-tez istifadə etdiyi ittihamlardan biridir.

Yəmənli siyasi müşahidəçilər bu qərarı Ümumxalq Konqresi Partiyasının digər rəhbərlərinə də təzyiqin artacağına dair siqnal kimi qiymətləndirirlər. Onların fikrincə, husilər partiya rəhbərliyinə Əhməd Əli Salehdən açıq şəkildə imtina etmələri üçün təzyiq göstərə bilər.