BAKI, AzerVoice

İran, iki ölkə arasında gərginliyin artması halında İsrailin Dimona şəhərində yerləşən nüvə tədqiqat mərkəzinə zərbə endirmək ehtimalını nəzərdən keçirir.

AzerVoice xəbər verir ki, bu barədə Qətərin "Al Jazeera" telekanalı, adının açıqlanmasını istəməyən İran rəsmisinə istinadən məlumat yayıb.

“Əgər münaqişə yeni mərhələyə keçərsə, Dimonadakı nüvə reaktoru bizim üçün qanuni bir hədəfə çevrilə bilər” - deyə, məlumatda bildirilib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.