BAKI, AzerVoice

Qətər hökumət başçısı və xarici işlər naziri şeyx Məhəmməd bin Əbdürrəhman Əl-Tani Tehranda İran və Oman xarici işlər nazirləri Abbas Əraqçi və Bədr əl-Busaidi ilə görüşüb.

AzerVoice xəbər verir ki, bu barədə Qətər Xarici İşlər Nazirliyi bəyanat yayıb.

Bəyanata görə, görüşdə Omanın vasitəçiliyi ilə ABŞ və İran arasında aparılan danışıqlardakı irəliləyişlər müzakirə olunub. Nazir Əl Tani, ABŞ və İranın region və dünya üçün təhlükəsizliyi gücləndirəcək ədalətli, dayanıqlı və məcburi xarakter daşıyan bir razılaşmaya nail olacağına ümid etdiyini bildirib.

Qətər Baş naziri İranda səfəri çərçivəsində İran Prezidenti Məsud Pezeşkiyan tərəfindən də qəbul edilib.

Xatırladaq ki, mayın 15-də ABŞ Prezidenti Donald Tramp, Fars körfəzi ölkələrinə etdiyi səfər çərçivəsində Dohada bəyan edib ki, İrana qarşı hərbi zərbə endirilməsinin qarşısını almaq üçün Qətər əmiri şeyx Təmim bin Həməd Əl-Taninin rolu önəmlidir.

“İran bəxtəvərdir ki, onun tərəfində ABŞ-ın zərbə endirməsini istəməyən Qətər əmiri var” - deyə, Tramp bildirib.

Qeyd edək ki, mayın 11-də İran və ABŞ, Omanın vasitəçiliyi ilə Tehranın nüvə proqramına dair danışıqların dördüncü raundunu keçiriblər. İran tərəfini xarici işlər naziri Seyid Abbas Araqçi, ABŞ tərəfini isə Donald Trampın xüsusi nümayəndəsi Stiven Uitkoff təmsil edib. Araqçi bu raundun əvvəlkilərdən daha ciddi keçdiyini, tərəflərin mövqelərinin yaxınlaşdığını bildirib. Mayın 16-da isə Tramp, Tehrana vəziyyətin nizamlanmasına dair yazılı təklif göndərildiyini bəyan edib.