BAKI,AzerVoice

Səudiyyə Ərəbistanının vəliəhdi və Baş naziri Məhəmməd bin Salman beynəlxalq ictimaiyyəti Fələstində baş verən İsrail təcavüzünün fəlakətli nəticələrinə son qoymağa çağırıb. AzerVoice xəbər verir ki, o, bu çağırışı Qurban bayramı münasibətilə Mina sarayında keçirilən illik qəbul mərasimində edib.
Vəliəhd qeyd edib ki, bu il Qurban bayramı Fələstin xalqının İsrailin davam edən təcavüzü nəticəsində əzab çəkdiyi bir dövrə təsadüf edir. O, beynəlxalq hüququn qərarlarına uyğun olaraq Fələstində sülhün bərqərar olunmasının vacibliyini vurğulayıb.

"Krallıq zəvvarlara xidmətə hər zaman hazırdır"
Məhəmməd bin Salman Hərəmeyni-Şərifeynə xidmətin Səudiyyə Ərəbistanı üçün şərəf olduğunu bildirərək, zəvvarların rahatlığı üçün bütün imkanların səfərbər edildiyini və bu istiqamətdə Krallığın məsuliyyətini dərk etdiyini deyib.

Qüds rəsmisindən Səudiyyəyə təşəkkür
Qüds və Fələstin diyarları baş katibi şeyx Məhəmməd Hüseyn isə İslam Əməkdaşlıq Təşkilatı adından çıxış edərək, Səudiyyənin müsəlmanların birliyini qorumağa və Fələstin məsələsində göstərdiyi tarixi dəstəyə görə minnətdarlığını bildirib. O, Krallığın Qəzzadakı "soyqırımı dayandırmaq və Fələstin dövlətinin tanınması üçün beynəlxalq dəstək toplamaq istiqamətindəki səylərini" yüksək qiymətləndirib.

Suriyadan minnətdarlıq mesajı
Suriyanın vəqflər naziri şeyx Məhəmməd Əbu əl-Xeyr Şükri isə Səudiyyə rəhbərliyinə zəvvarlara göstərilən xidmətlərə görə təşəkkür edib və Krallığın 2030 vizyonunun zəvvar xidmətlərinə müsbət təsir etdiyini vurğulayıb. O, həmçinin zəvvarların təhlükəsizliyinin təmin olunmasında yüksək texnologiyaların və qabaqcadan planlaşdırmanın rolunu qeyd edib.

İkitərəfli əlaqələr müzakirə edilib
Eyni zamanda şənbə günü Mina sarayında vəliəhd Məhəmməd bin Salman Mavritaniya prezidenti Məhəmməd uld Şeyx əl-Ğəzuani və Maldivlər prezidenti Məhəmməd Müizz ilə görüşərək bayram təbriklərini mübadilə edib, eləcə də ikitərəfli əlaqələr və əməkdaşlıq imkanlarını müzakirə edib.