BAKI, AzerVoice
İsrailin Qəzzadakı hücumları beynəlxalq hüququ pozur.
AzerVoice xəbər verir ki, BMT-nin İnsan Haqları üzrə Ali Komissarı Volker Türk İsrailin Qəzza zolağında mülki şəxslərə qarşı həyata keçirdiyi hücumlar beynəlxalq hüququ pozduğunu bildirib.
Türkün yazılı açıqlamasında qeyd olunub ki, az miqdarda ərzaq yardımına çatmağa çalışan fələstinlilərə qarşı İsrailin həyata keçirdiyi ölümcül hücumlar “vicdansızlıqdır”. O, müstəqil və qərəzsiz araşdırmanın vacibliyini vurğulayaraq, məsul şəxslərin beynəlxalq hüquq qarşısında cavab verməli olduğunu bildirib.
“Mülki insanlara qarşı hücumlar beynəlxalq hüququn ciddi şəkildə pozulması və müharibə cinayəti təşkil edir”, – deyə Türk bildirib.
O vurğulayıb ki, fələstinlilər ya aclıqdan ölmək, ya da qida yardımına yaxınlaşarkən həyatını itirmək ilə üz-üzə qalıb. Onun sözlərinə görə, İsrail humanitar yardımın paylanması ilə bağlı beynəlxalq öhdəlikləri və standartları kobud şəkildə pozur.
Türk əlavə edib ki, qəsdən ərzaq və digər həyati vacib ləvazimatların əhalidən əsirgənməsi də müharibə cinayətləri kateqoriyasına aiddir. O, Qəzzada mülki əhaliyə qarşı baş verənləri “ən ağır cinayətlərin elementləri” adlandırıb.
Qeyd edək ki, Beynəlxalq Ədalət Məhkəsi bu il İsrailə təcili humanitar yardımın təmin olunması ilə bağlı məcburi qərar verib. Volker Türk isə bu öhdəliklərə əməl olunmamasının heç bir hüquqi əsasının olmadığını qeyd edib.
Bildirilib ki, mayın 27-dən etibarən İsrail ordusu ABŞ-ın rəhbərlik etdiyi “Qəzzaya Humanitar Yardım Fondu” çərçivəsində qurulan paylama məntəqələrinə hücumlar həyata keçirir. “Bufer zonalar” adlandırılan ərazilərdə humanitar yardım üçün toplaşan mülki şəxslər hədəf alınır.
İyunun 1-də Qəzzada iki fərqli bölgədə yardım almağa çalışan fələstinlilərə qarşı təşkil olunan hücumlarda 32 nəfər həlak olub, 232 nəfər isə yaralanıb.
BMT-nin Fələstinli Qaçqınlara Yardım və İşlər üzrə Agentliyinin (UNRWA) baş komissarı Filip Lazzarini bildirib ki, “Qəzzada yardım paylaması artıq ölüm tələsinə çevrilib”.
İsrail ordusu isə bu gün səhər humanitar yardım mərkəzinə gələn fələstinlilərə atəş açdığını rəsmi olaraq etiraf edib.