BAKI, AzerVoice

“Al Baraka Azerbaijan” könüllüləri bu gün ilk dəfə “Yetimə Dəstək” layihəsi çərçivəsində 13 yetim uşağa may ayı üçün maddi yardım göstərib. Könüllülərin sözlərinə görə, layihə bölgədəki müharibə şəraitində reallaşdırılıb və yardımlar zamanı gözlənilməz hadisə baş verib.

AzerVoice xəbər verir ki, məlumata görə, yardım prosesi zamanı düşərgə yaxınlığına bomba düşüb. Hadisə videolarda aydın eşidilən partlayış səsi ilə əks olunub. Könüllülər bildiriblər ki, yardımlar qorxu və xaos içində davam etdirilib.

“Al Baraka Azerbaijan” könüllülərinin açıqlamasına görə, bu hadisə müharibə bölgələrində yaşayan günahsız uşaqların yalnız maddi yardıma deyil, həm də sülhə ehtiyaclarının olduğunu bir daha sübut edib.

Bütün çətinliklərə baxmayaraq, layihə uğurla tamamlanıb. Könüllülər “əlhəmdulilləh, həm bizim, həm də uşaqlar üçün unudulmaz və təsirli bir gün oldu” deyərək təşəkkürlərini bildiriblər.

“Al Baraka Azerbaijan” könüllüləri yetimlərə dəstəyin davam edəcəyini və yardımların Allahın izni ilə sürəcəyi mesajını verib. Onlar bu işdə dayanmayacaqlarını, yardım əllərini daha da genişləndirəcəklərini qeyd ediblər.