BAKI, AzerVoice
Misir hökuməti, Birləşmiş Ərəb Əmirliklərində Əl-Əzhər şeyxi Əhməd əl-Tayyib və mərhum Roma Papası Fransisk arasında imzalanan “İnsan Qardaşlığı” sənədini milli təhsil strategiyasının əsas elementi kimi qəbul edib. AzerVoice xəbər verir ki, məqsəd yeni nəsillərə tolerantlıq, qarşılıqlı hörmət və dini müxtəlifliyə açıq münasibət ruhunda tərbiyə verməkdir.
Misirin Təhsil Naziri Məhəmməd Əbdüllətif, yaxın günlərdə Əl-Əzhər şeyxi ilə görüşündə bu sənədin bütün təhsil pillələrində dərsliklərə daxil ediləcəyini açıqlayıb. Onun sözlərinə görə, sənəd sadə və aydın formada təqdim ediləcək və bütün yaş qruplarına uyğunlaşdırılacaq.
Qeyd olunan sənəd ilk dəfə 2019-cu ildə Əbu-Dabidə keçirilən “İnsan Qardaşlığı üzrə Ümumdünya Konfransı” çərçivəsində imzalanmışdı. Sənəddə insan hüquqları, din azadlığı, birgə yaşayış və zorakı dini təbliğatın rədd edilməsi kimi prinsiplər yer alır.
Prezident Əbdülfəttah əs-Sisinin təşəbbüsü ilə bu sənədin milli strategiya səviyyəsinə qaldırılması, Misirdə vətəndaşlıq və birgəyaşayış mədəniyyətinin təşviqinə yönəlib. Sisi, dinlərarası münasibətlərin fətvalar və dini təbliğatla deyil, vətəndaş cəmiyyəti və təhsil yolu ilə qurulmasını müdafiə edir.
Keçmiş millət vəkili və dinşünas tədqiqatçı Məhəmməd Əbu Hamid bildirib ki, bu təşəbbüs gənclər arasında ayrı-seçkilik və dini düşmənçiliyin qarşısını almaq üçün ciddi əhəmiyyət daşıyır. Onun fikrincə, məktəblərdə bu sənədin tədrisi, qarşılıqlı anlaşma və dəyərlərin formalaşdırılmasına böyük töhfə verəcək.
Lakin təşəbbüsə İslamçı cərəyanlar etiraz edirlər. Onlar sənədin dinlərarası yaxınlaşmanı təşviq etdiyini və “İslamı zəiflətməyə xidmət etdiyini” iddia edirlər.
Əl-Əzhər şeyxi Əhməd əl-Tayyib isə bildirib ki, dini institutların təkbaşına cəmiyyətdə tolerantlığı yaymaq imkanları məhduddur və bu prosesi təhsil sistemi ilə dəstəkləmək zəruridir. Onun sözlərinə görə, sənədin ümummilli şəkildə tədrisi gənc nəslin zorakı və bölücü təfəkkürlərə qarşı müqavimətini artıracaq.
Hazırda Misirdə 25 milyondan artıq şagird və tələbə təhsil alır. Rəsmilər ümid edirlər ki, “İnsan Qardaşlığı” sənədinin dərs proqramlarına daxil edilməsi gələcək nəsillərin daha sülhsevər və dözümlü fərdlər kimi formalaşmasına şərait yaradacaq.