BAKI,VOA, Fərid Mikayılov

İran Xarici İşlər Nazirliyi İsrailin Livanın cənub bölgələrinə qarşı həyata keçirdiyi hücumları qınayıb.

VOA xəbər verir ki, İran Xarici İşlər Nazirliyinin sözçüsü İsmayıl Bəqai son günlər İsrail tərəfindən Livanın cənubuna endirilən zərbələri “qəddar hücumlar” adlandırıb.

Bəqai bildirib ki, hücumlar nəticəsində bir sıra Livan vətəndaşı həlak olub və yaralanıb, həmçinin infrastruktur obyektlərinə və yaşayış evlərinə ziyan dəyib.

İran rəsmisi İsrailin Livan ərazilərini işğal etməsini və ölkənin ərazi bütövlüyü ilə milli suverenliyini pozmasını tənqid edib.

Onun sözlərinə görə, beynəlxalq qurumların, xüsusilə BMT Təhlükəsizlik Şurasının susqunluğu və laqeydliyi İsrailin addımlarını davam etdirməsinə şərait yaradır.

Bəqai ABŞ administrasiyasını da İsrailin Livanda, Fələstin ərazilərində və bütövlükdə regionda həyata keçirdiyi əməliyyatlarda tərəfdaş olmaqda ittiham edib.

İran Xarici İşlər Nazirliyinin sözçüsü Livan xalqının İsrail hücumları və işğalına qarşı müqavimətini yüksək qiymətləndirib və Tehranın Livanın suverenliyini, müstəqilliyini və ərazi bütövlüyünü qorumaq istiqamətində tam dəstəyini ifadə edib.

İsrail hərbi təyyarələrinin bazar ertəsi günü Livanın cənubundakı Mənsuri qəsəbəsi yaxınlığındakı ərazilərə zərbələr endirdiyi bildirilib. Hücum atəşkəs rejiminin yeni pozuntusu kimi qiymətləndirilib.