BAKI,VOA,Yusif Şərifzadə

İranda internet xidmətlərinin mərhələli şəkildə bərpasına yönəlmiş qərar hüquqi maneə ilə üzləşib.

VOA xəbər verir ki, İranın məhkəmə hakimiyyəti ABŞ–İsrail müharibəsi dövründə tətbiq olunan internet məhdudiyyətlərinin yumşaldılması istiqamətində fəaliyyət göstərən prezident administrasiyasına bağlı qurumun işini dayandırıb.

İran məhkəmə sisteminə bağlı Mizan Onlayn portalının yaydığı məlumata əsasən, “Ölkənin Kiber Məkanının Təşkili və İdarə Edilməsi üzrə Xüsusi Qərargah”ın fəaliyyətinin dayandırılması ölkə daxilində daxil olan şikayətlərdən sonra həyata keçirilib.

Məlumata görə, həmin qurum bazar ertəsi İran daxilində internet xidmətlərinin bərpası ilə bağlı qərar qəbul etmişdi. Hökumətin sözçüsü Fatimə Mühacirani yerli mediaya açıqlamasında Prezident Məsud Pezeşkianın bu məsələ ilə bağlı göstəriş verdiyini bildirmişdi.

İran hakimiyyəti ilk genişmiqyaslı internet məhdudiyyətlərini ilin əvvəlində ölkədə baş vermiş etiraz aksiyaları zamanı tətbiq etmişdi. Daha sonra isə fevral ayının sonunda müharibənin başlanması ilə internetə çıxış üzərində nəzarət daha da sərtləşdirilmişdi.

Son həftələrdə ölkədə “Pro İnternet” adlı mərhələli internet sistemi də tətbiq olunmağa başlanıb. İran mediasının məlumatına əsasən, bu sistem müəyyən peşə qruplarına daha yüksək ödəniş müqabilində daha geniş internet imkanları təqdim edir.