BAKI,VOA, Nailə Babazadə

İran Prezidenti Məsud Pezeşkian və Pakistanın Baş naziri Şahbaz Şərif arasında regiondakı gərginlik və əldə olunmuş atəşkəs prosesi ilə bağlı mühüm telefon danışığı baş tutub. Pezeşkian danışıq zamanı İranın sülhə sadiqliyini, eyni zamanda ölkəsinin suverenliyinə qarşı istənilən təhdidə cavab verəcəyini vurğulayıb.

VOA xəbər verir ki, prezident Pezeşkian ABŞ-ın beynəlxalq hüququ pozan keçmişinə baxmayaraq, Pakistanın atəşkəs təklifinə İranın müsbət yanaşmasının Tehranın məsuliyyətli mövqeyini göstərdiyini bildirib. Lakin o, İranın Siri və Lavan adalarına edilən hücumların atəşkəs rejiminin kobud şəkildə pozulması mənasına gəldiyini xatırladıb: "İran hər növ hücuma eyni şəkildə qarşılıq verəcəkdir".

İran tərəfi tərəfdaşlarına təqdim etdiyi 10 maddəlik şərtlər siyahısında Livan mövzusunun qırmızı xətt olduğunu bir daha bəyan edib. Pezeşkian vurğulayıb ki, İranın təklif etdiyi şərtlərdən biri də Livan ərazisində dərhal atəşkəsin təmin edilməsidir. Onun sözlərinə görə, bölgədə sülhün qalıcı olması üçün tərəflər öz üzərlərinə götürdükləri öhdəliklərə tam əməl etməlidirlər.

Baş nazir Şahbaz Şərif isə öz növbəsində İsrailin Livana qarşı hücumlarının ümumi sülh sazişinin bir hissəsi kimi dayandırılmalı olduğunu qeyd edib. Şərif Pakistanın regional sabitlik və qalıcı sülh naminə bütün ölkələrlə sıx əməkdaşlığa hazır olduğunu bildirib. Bu təmaslar yaxın günlərdə İslamabadda keçirilməsi planlaşdırılan yekun sülh danışıqları öncəsi tərəflərin mövqelərinin dəqiqləşdirilməsi baxımından kritik əhəmiyyət daşıyır.