BAKI,VOA, Nailə Babazadə

İran İslam İnqilabı Keşikçiləri Korpusu (SEPAH) Küveytdəki enerji stansiyası və su təmizləyici qurğuya edilən hücumun arxasında İsrailin dayandığını iddia edib.

VOA xəbər verir ki, İran dövlət televiziyasının yaydığı bəyanatda bildirilir ki, bu hücum Tehranı günahlandırmaq məqsədilə həyata keçirilən "saxta bayraq" (false flag) əməliyyatıdır. SEPAH bəyan edib ki, Küveytin dəniz suyunu şirinləşdirən mərkəzlərinə edilən bu zərbə "Sionist rejimin alçaqlığının göstəricisidir" və İranın bu hadisə ilə heç bir əlaqəsi yoxdur.

Korpusun bəyanatında Qərbi Asiya regionu ölkələrinə çağırış edilib ki, "Amerika-Sionist qüvvələrinin bölgəni qeyri-sabitləşdirmək və dağıtmaq məqsədli təxribatlarına" qarşı ayıq olsunlar. Tehran iddia edir ki, İsrail bu cür gizli əməliyyatlarla ərəb ölkələrini İrana qarşı qızışdırmağa çalışır. Lakin Küveyt tərəfi bu iddialarla razılaşmır. Küveyt Elektrik və Su Nazirliyi martın 30-da rəsmən elan etmişdi ki, elektrik stansiyası və su təmizləyici qurğu məhz İrandan edilən hücum nəticəsində vurulub.

Böhranlı vəziyyət bu gün də davam edib. Küveyt Elektrik və Su Nazirliyi səhər saatlarında yenidən İrandan həyata keçirilən hücum nəticəsində enerji və su təmizləyici obyektlərdən birində ciddi maddi ziyanın yarandığını açıqlayıb. Regionda "Epic Fury" əməliyyatı ilə başlayan gərginlik fonunda strateji infrastrukturların hədəf alınması mülki əhalinin həyati ehtiyaclarının təminatında ciddi problemlər yaradır. Küveyt ordusu gecə ərzində dəfələrlə PUA və raket hücumlarını dəf etdiyini bildirsə də, qarşılıqlı ittihamlar diplomatik gərginliyi pik həddə çatdırıb.