BAKI, VOA, Nailə Babazadə
İsrail ordusunun gecə saatlarında həyata keçirdiyi hava hücumunda İran Milli Təhlükəsizlik Ali Şurasının katibi Əli Laricaninin hədəf alındığı irəli sürülüb.
VOA xəbər verir ki, yerli mətbuata danışan və adı açıqlanmayan İsrailli rəsmi ordunun gecə Laricanini hədəf alan əməliyyat keçirdiyini iddia edib. Həmin rəsmi Laricaniyə qarşı təşkil edilən hava hücumunun nəticəsinin hələlik məlum olmadığını bildirib.
Digər tərəfdən, İsrail Baş Qərargah rəisi Eyal Zamir İsrail ordusunun ötən gecə İranda "mühüm şəxsləri" hədəf aldığı barədə açıqlama verib. İran rəsmiləri isə Laricaniyə qarşı hücum iddiaları ilə bağlı hələlik hər hansı bir bəyanat yaymayıblar.
Hücumlar zamanı həmçinin İran İnqilabı Keşikçiləri Korpusunun (SEPAH) nəzdindəki "Bəsic" qüvvələrinin komandanı Qulam Rza Süleymaninin də hədəf alındığı iddia olunur. Bu hücumun da nəticəsi barədə hələlik dəqiq məlumatın olmadığı qeyd edilib.