BAKI, AzerVoice

Çinli həkimlər 5000 kilometr məsafədən peyk vasitəsilə uğurlu cərrahiyyə əməliyyatı həyata keçiriblər.

AzerVoice xəbər verir ki, Çinli cərrah Prof. Dr. Rong Liunun rəhbərlik etdiyi tibbi heyət Lhasadan, təxminən 5000 kilometr məsafədə yerləşən Pekindəki iki xəstə üzərində peyk texnologiyası və robot cərrahiyyəsi vasitəsilə uğurlu əməliyyatlar aparıb.

Ənənəvi 5G texnologiyasında məsafəyə görə gecikmələr olsa da, bu əməliyyatlarda “Apstar-6D” adlı yüksək texnologiyalı peyk sistemindən istifadə edilməklə məlumat axını fasiləsiz və gecikməsiz təmin edilib. Həkimlər tərəfindən qaraciyər xərçəngi və hemangioma diaqnozu qoyulan iki xəstəyə aparılan müdaxilə ümumilikdə 124 dəqiqə davam edib.

Əməliyyatlar yüksək dəqiqliklə və problemsiz şəkildə tamamlanıb. Açıqlamada qeyd olunub ki, xəstələrdə ciddi fəsadlar müşahidə olunmayıb və hər iki şəxs əməliyyatdan cəmi 24 saat sonra evə buraxılıb.

Qeyd edək ki, bu əməliyyat tibb sahəsində uzaq məsafədən robot dəstəyi ilə cərrahiyyənin texnoloji inkişafında əlamətdar addım sayılır və gələcəkdə geniş tətbiq imkanlarını önə çıxarır.