BAKI, AzerVoice

Alimlər insan orqanizmində qocalma prosesinin iki kritik yaş dövründə – 40-cı yaşların ortaları və 60-cı yaşların əvvəllərində kəskin şəkildə sürətləndiyini müəyyən ediblər.

AzerVoice xəbər verir ki, Stanford Universitetinin genetik alimi Maykl Snayder bu yaş dövrlərinin orqanizmdə dramatik dəyişikliklər yaratdığını bildirir. Onun sözlərinə görə, qocalma prosesi tədrici deyil, müəyyən dövrlərdə sürətlə gedən bioloji dəyişikliklər toplusudur.

Tədqiqatçılar 108 yetkin insanın bioloji nümunələrini illər ərzində izləyərək, 135 mindən çox bioloji faktoru təhlil ediblər. Nəticələr göstərib ki, molekulların 81 faizi 44-60 yaş arasında əhəmiyyətli dəyişikliklərə məruz qalır.

40-cı yaşların ortaları – Lipid, kofein və spirt mübadiləsi, ürək-damar xəstəlikləri, dəri və əzələ funksiyalarında ciddi dəyişikliklər baş verir.
60-cı yaşların əvvəlləri – Karbohidrat mübadiləsi, immun sistemi və böyrək funksiyalarında nəzərəçarpacaq dəyişikliklər müşahidə olunur.

Tədqiqat menopoz və perimenopozun qocalma prosesinə təsirini də araşdırıb. Lakin nəticələr göstərib ki, bu dəyişikliklər kişilərdə də eyni yaş aralığında baş verir. Tədqiqatın aparıcı müəllifi, metabolomika üzrə ekspert Xiaotao Shen qeyd edib ki, bu, qocalmanın daha geniş miqyaslı bioloji faktorlarla əlaqəli olduğunu sübut edir.

Mütəxəssislər araşdırmanın 25-70 yaş aralığında aparıldığını və daha geniş yaş qruplarını əhatə edən yeni tədqiqatların vacib olduğunu bildirirlər.