BAKI,VOA

1469-cu il mayın 3-də italyan filosofu və yazıçısı Nikkolo Makiavelli anadan olub. O, müasir siyasi nəzəriyyənin banilərindən biri hesab edilir.

Florensiya şəhərində doğulan Makiavelli 29 yaşında dövlət xidmətinə başlayaraq qısa müddətdə mühüm siyasi fiqura çevrilib. Müdafiə katibi kimi fəaliyyət göstərdiyi dövrdə şəhərin siyasi gücünün artmasına töhfə verib. Diplomatik missiyaları çərçivəsində o, XII Lüdovik, II Yuli və I Maksimilian kimi dövrünün mühüm liderləri ilə görüşüb. Xüsusilə Cesare Borgia onun siyasi baxışlarına ciddi təsir göstərib.

1512-ci ildə Medici ailəsi ilə münasibətləri pisləşdikdən sonra Makiavelli vəzifədən uzaqlaşdırılıb, həbs olunub və işgəncələrə məruz qalıb. Daha sonra müvəqqəti sürgün həyatı yaşayıb.

Bu dövrdə o, ən məşhur əsəri olan “Hökmdar” əsərini yazıb. 1513-cü ildə qələmə alınan və 1532-ci ildə nəşr olunan bu əsərdə Makiavelli ideal lider modelini – məqsədə çatmaq üçün vasitələri əsas sayan praqmatik və sərt hökmdar obrazını təsvir edib.

Lakin bu əsər ona gözlənilən siyasi dəstəyi qazandırmadı və o, ömrünün sonuna qədər siyasətdən kənarda qaldı. 1527-ci ildə vəfat edən Makiavelli həyatını həsr etdiyi Florensiya cəmiyyətindən uzaq şəkildə dünyasını dəyişib.