BAKI,VOA, Orxan Qədirzadə

1999-cu ilin 20 aprel tarixində ABŞ-da ən sarsıdıcı məktəb hücumlarından biri baş verib. Kolorado ştatının Litlton şəhərində yerləşən Columbine High School məktəbində iki yeniyetmə silahlı hücum həyata keçirərək 13 nəfəri qətlə yetirib.

Hadisə yerli vaxtla saat 11:19-da başlayıb. 17 yaşlı Dylan Klebold və 18 yaşlı Eric Harris əvvəlcə məktəbin ərazisində atəş açıb, daha sonra binaya daxil olaraq hücumu davam etdiriblər. Qısa müddət ərzində 12 şagird və bir müəllim həyatını itirib, 20-dən çox insan yaralanıb. Günorta saatlarında hücum edənlər özlərinə atəş açaraq intihar ediblər.

Sonrakı araşdırmalar zamanı məlum olub ki, hücum əvvəlcədən planlaşdırılıb və məktəbin yeməkxanasında partlayış törətmək üçün qurulan qaz bombaları işə düşmədikdən sonra silahlı hücum həyata keçirilib. Hücumun motivləri ilə bağlı müxtəlif ehtimallar irəli sürülsə də, qurbanların əsasən təsadüfi seçildiyi müəyyən edilib.

Hadisə ABŞ-da silah nəzarəti, məktəblərdə təhlükəsizlik və gənclər arasında zorakılığın səbəbləri ilə bağlı geniş ictimai müzakirələrə səbəb olub. Kolumbayn qətliamı sonrakı illərdə baş verən bir sıra məktəb hücumları ilə müqayisə edilərək ölkədə bu problemin miqyasını gündəmə gətirib.

Həmin ilin payızında məktəb yenidən fəaliyyətə başlasa da, faciə Litlton icması üçün dərin iz buraxıb. Hadisə ilə bağlı hüquqi proseslər, məhkəmə iddiaları və ictimai reaksiyalar uzun müddət davam edib.