BAKI,VOA

1968-ci il martın 16-da Amerika əsgərlərindən ibarət taqım Cənubi Vyetnamın şimal sahilləri yaxınlığında yerləşən kiçik kəndlərdən biri olan My Lai-də 500-ə qədər silahsız mülki şəxsi vəhşicəsinə qətlə yetirib.

Təxminən iki il boyu gizli saxlanılan bu cinayət sonradan tarixə "My Lai qətliamı" kimi düşüb.

1968-ci ilin martında "Charlie" bölüyünün əsgərlərdən ibarət taqımı Viet Konq partizanlarının Quanq Nqai bölgəsindəki Son My kəndində gizlənməsi barədə məlumat alır. Martın 16-sı səhər saatlarında taqım "axtar və məhv et" missiyası çərçivəsində kəndin dörd yaşayış məntəqəsindən biri olan My Lai 4-ə daxil olur. Lakin əsgərlər orada partizan döyüşçüləri əvəzinə silahsız kəndliləri — əksəriyyəti qadın, uşaq və yaşlı kişilərdən ibarət insanları tapırlar.

Hücumdan əvvəl ordu komandanlığı əsgərlərə My Lai-də tapılan hər kəsin Viet Konq üzvü və ya onlara rəğbət bəsləyənlər hesab edilə biləcəyi barədə təlimat vermiş və kəndi məhv etməyi tapşırmışdı. Əsgərlər fövqəladə qəddarlıq nümayiş etdirərək, kəndliləri öldürməzdən əvvəl onları zorlayıb işgəncəyə məruz qoyublar. Aralarında azyaşlı uşaqlar və körpələrin də olduğu onlarla insanı xəndəyə sürükləyərək avtomat silahlardan atəş açmaqla edam ediblər.

Məlumata görə, qətliam yalnız ordu helikopterinin pilotu, uorent-ofiser Hyu Tompsonun təyyarəsini əsgərlərlə qaçan kəndlilər arasında yerə endirməsi və hücumların davam edəcəyi təqdirdə atəş açacağı ilə hədələməsindən sonra dayanıb.

My Lai-də baş verənlər araşdırmaçı jurnalist Seymur Herş tərəfindən ifşa olunana qədər yüksək rütbəli ordu zabitləri tərəfindən ört-basdır edilib. Tezliklə My Lai hadisəsi qəzetlərin manşetlərinə daşınaraq beynəlxalq miqyaslı bir qalmaqala çevrilib.