BAKI, AzerVoice, Orxan Qədirzadə

Ağır çəkidə keçmiş dünya boks çempionu Mayk Tayson 18 yaşlı gözəllik müsabiqəsi iştirakçısı Dezire Vaşinqtona təcavüz etməkdə təqsirli bilinib. İndiana ştatının andlılar məhkəməsi Taysonun günahını sübuta yetirilmiş hesab edib.

Məhkəmə növbəti ay boksçuya qarşı 10 il müddətinə azadlıqdan məhrumetmə cəzası çıxarıb (hökmün 4 ili şərti hesab edilib).

Mayk Tayson 1986-cı ildə Trevor Berbiki məğlub edərək 20 yaşında boks tarixinin ən gənc ağır çəkili çempionu kimi şöhrət qazanmışdı. Lakin 1991-ci ilin iyulunda İndianapolisdə "Miss Black America" müsabiqəsinin məşqi zamanı Dezire Vaşinqtonla tanışlığı onun taleyini kəskin şəkildə dəyişib. Vaşinqtonun otel otağında təcavüzə məruz qaldığını bildirməsinə baxmayaraq, Tayson münasibətin qarşılıqlı razılıq əsasında olduğunu iddia edirdi. 1992-ci ilin fevralında məhkum edilən döyüşçü cəzasının üç ilini çəkdikdən sonra 1995-ci ildə azadlığa buraxılıb.

Həbsdən sonra 1996-cı ildə çempionluq kəmərini qısa müddətə geri qaytarsa da, Tayson qalmaqallardan uzaq dura bilməyib. 1997-ci ildə Evander Holifildlə döyüş zamanı rəqibinin qulağının bir hissəsini dişləyərək qoparması onun boks lisenziyasının müvəqqəti ləğvinə səbəb olub. Narkotik asılılığı, maliyyə çətinlikləri və yol qəzasından sonra sürücülərə hücum etdiyi üçün yenidən həbsxanaya düşməsi onun karyerasına ciddi zərbə vurub. "Dəmir Mayk" ləqəbli boksçunun peşəkar karyerası 2005-ci ildə Kevin Makbraydla döyüşü yarıda tərk etməsi ilə başa çatıb.