BAKI,AzerVoice

Dövlət Sosial Müdafiə Fondunun (DSMF) büdcəsinin balanslaşdırılması məqsədilə 2026-cı il dövlət büdcəsində 1 700 000 000 manat vəsait nəzərdə tutulur.

AzerVoice-in məlumatına görə, bu məsələ Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirə olunan “Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb.

Sənədə əsasən, bu da 2025-ci illə müqayisədə 100 000 000 manat və ya 6,3 % çoxdur.

Bu vəsaitin Fondun xərclərinin tərkibində xüsusi çəkisi 20,0 % təşkil edəcək.

Xərclərin artımının əsas səbəbi pensiya ödənişi xərclərinin cari il üçün ölkə üzrə gözlənilən ortaaylıq əməkhaqqının artım tempinə müvafiq olaraq indeksləşdirilməsi ilə bağlıdır.

Azərbaycan Respublikası dövlət sosial müdafiəsi fondunun büdcəsinin xərcləri 8 483 100 000 manat (2025-ci illə müqayisədə 806 700 000 manat və ya 10,5 % çox) səviyyəsində proqnozlaşdırılır.

Xərclərin 8 323 100 000 manatı fondun gəlirləri (2025-ci illə müqayisədə 705 700 000 manat və ya 9,3 % çox), 160 000 000 manatı isə fondun cari ilin sonuna istifadə olunmamış qalığı hesabına qarşılanması nəzərdə tutulur.

Fondun büdcəsinin xərclərinin əsas hissəsini əmək pensiyalarının, sosial sığorta haqqı hesabına müavinətlərin ödənişi, həmçinin Fondun aparatının və digər struktur bölmələrinin saxlanılması ilə bağlı xərclər təşkil edəcək.

İşsizlikdən sığorta fondunun büdcəsinin xərcləri 266 400 000 manat (2025-ci illə müqayisədə 5 700 000 manat və ya 2,2 % çox) səviyyəsində proqnozlaşdırılır.

Xərclərin 238 300 000 manatı fondun gəlirləri (2025-ci illə müqayisədə 31 900 000 manat və ya 15,5 % çox), 28 100 000 manatı isə fondun cari ilin sonuna istifadə olunmamış qalığı hesabına qarşılanması nəzərdə tutulur.