Bakı,AzerVoice

Azərbaycanın COP29 kimi mötəbər tədbiri öz üzərinə götürməsi ölkəmiz və hamımız üçün böyük bir imkandır.

AzerVoice xəbər verir ki, COP29-un prezidenti, Azərbaycanın ekologiya və təbii sərvətlər naziri Muxtar Babayev Azərbaycanın Dayanıqlı Yaşıl Tikinti rəhbərlərinin dəyirmi masa müzakirəsində çıxışı zamanı deyib.

“Bununla biz dünyaya nail olduğumuz hədəfləri, gələcək layihələrimizi göstərə bilərik. Azərbaycan regionda lider ölkə kimi, dünyadakı iqlim məsələlərinin həllində də öz liderliyini göstərəcək. Biz komandamızla əksər ölkələrdə olduq və bu prosesə nə qədər maraqlı olduğunu gördük. İstəyərdik ki, ölkəmiz bu məsələdə, hər zaman olduğu kimi, irəli getsin, dünya üçün nümunə gətirək”, - deyə nazir əlavə edib.

Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.

Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.

Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.