Bakı, AzerVoice

Türkiydə yerli istehsalçıların qorunması üçün buğdanın idxalına qoyulan qadağa oktyabrın 15-dən əvvəl ləğv edilməyəcəkdir.

AzerVoice xəbər verir ki, Türkiyə Torpaq Məhsulları Ofisinin (TMO) baş direktoru Ahmet Güldal, "15 Oktyabr tarixinə qədər təyin edilmiş idxal qadağası məhsul yığım dövrü bitmədən və istehsalçılarımızın məhsulları ticarət üçün bazara daxil olmadan heç bir halda yumşaldılmayacaq" deyib.

Güldal, taxıl satınalma siyasəti çərçivəsində xarici ticarət tədbirlərinin həyata keçirildiyini söyləyib.

Görülən bu tədbirlərlə məhsul yığımı dövründə istehsalçıların mənafeyini qoruduqlarını bildirən Güldal, "Bunlardan biri də 15 oktyabra qədər taxıl idxalına qoyulan qadağa idi. Bu proses davam edir. Heç bir şəkildə buğda və arpa idxal etmirik. Məhsul yığım dövrü yekunlaşıb yerli məhsullar bazara daxil olmadan idxala qoyulan məhdudiyyət heç bir halda yumşaldılmayacaq"-deyə əlavə edib.

Əvvəlki dövrlərdə Türkiyənin daxili tədarük təhlükəsizliyini təmin etmək üçün ixrac məhdudiyyətləri qoyulduğunu deyən Güdal, "2024-cü ilin məhsul yığımı dövründə bu ixrac məhdudiyyətlərini qaldırdıq. Taxılda ixraca icazə veririk. Son bir ayda təxminən 300 min ton bərk buğda, çörək buğdası və arpa ixracı həyata keçirdik. Bu, istehsalçılarımızı qorumaq üçün vacib və dəyərlidir”- deyə bildirib.

Yerli buğdadan hazırlanmış unun ixrac edilməsinə də məhdudiyyət qoyulduğunu lakin indi bu məhdudiyyətin ləğv edildiyini bildirən Güldal qeyd edib ki, hal-hazırda buğdadan un istehsal edərək heç bir idxal tələbi olmasa belə xaricə ixrac etmək mümkündür.