Bakı, AzerVoice

COP29 çərçivəsində Su Məsələləri və İqlim Fəaliyyətləri üzrə Bakı Dialoqunun işə başlanmasına dair niyyət məktubu imzalanıb.

AzerVoice xəbər verir ki, sənədi COP29 prezidenti, Azərbaycanın ekologiya və təbii sərvətlər naziri Muxtar Babayev və Birləşmiş Millətlər Təşkilatının (BMT) Baş katibinin müavini, BMT-nin Ətraf Mühit Proqramının (UNEP) icraçı direktoru İnqer Andersen imzalayıblar.

Muxtar Babayevin sözlərinə görə, bu platforma COP-lar arasında əməkdaşlıq mexanizmi rolunu oynayaraq su məsələlərinə davamlı diqqətin təmin olunmasına xidmət edəcək. Platforma su, iqlim dəyişikliyi, biomüxtəlifliyin itirilməsi, çirklənmə və səhralaşma arasındakı əlaqələri araşdıracaq, beynəlxalq və regional səviyyədə fəaliyyətlərə xüsusi diqqət yetirəcək.

Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.

COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.

Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.

COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.

COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.

İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.