BAKI, VOA
Bu xəbər internetdə hər altı həftədən bir yayılan növbəti "Audi R8 qayıdır" şayiələrindən deyil. Qarşınızda Audini superkar xəritəsinə birdəfəlik və daha güclü şəkildə qaytaran tamamilə real "Audi Nuvolari" modelidir. Titan rəngli bu möhtəşəm avtomobil Audi tarixinin ən güclü seriyalı istehsal modeli statusunu daşıyır.
VOA xəbər verir ki, Formula 1 Monako Qran-pri şənlikləri zamanı nümayiş etdirilən bu superkar hibrid sistemlə kombinasiya olunmuş ikiqat turboşarjlı 4.0 litrlik V8 mühərriki ilə təchiz edilib. Təxminən 1000 at gücü hasil edən və 10000 dövriyyəyə (RPM) qədər qalxa bilən bu mühərrik korporativ qardaş "Lamborghini Temerario" modelindən götürülsə də ondan daha çox gücə sahibdir. Avtomobildə ön oxda iki, arxa oxda isə bir ədəd olmaqla üç elektrik motoru quraşdırılıb. Bu güc paketi 7.3-kWh batareya sayəsində avtomobilin sıfırdan saatda 60 mil (0-96 km/s) sürəti cəmi 2.6 saniyəyə yığmasına və saatda 217 mil (350 km/s) maksimum sürət toplamasına imkan verir.
Şirkətin baş texnoloji direktoru Ruven Mohr (Rouven Mohr) bildirir ki, Audi-nin F1 yarışlarında iştirakı trasdakı texnologiyaların yollara ötürülməsini sürətləndirib. Avtomobilin titan çaları birbaşa Audinin F1 maşınından götürülüb. Məşhur italyan yarışçısı Tazio Nuvolarinin şərəfinə adlandırılan bu superkar fırlanma anını künclərdə və əyləcləmə zamanı paylayan "quattro predictive ride" adlı ən son tam ötürücü sistemə malikdir. Həmçinin avtomobildə sükan üzərindəki xüsusi düymə ilə idarə olunan və üç rejimə (Bağlı, Aşağı yerəbasma və Yüksək yerəbasma) malik olan aktiv arxa qanad mövcuddur. Bu aerodinamik elementlər avtomobilə 882 funt (təxminən 400 kq) yerəbasma qüvvəsi qazandırır.
Salonda isə mühəndislər nəhəng ekran xaosundan qaçıblar. Tabloda yalnız sürücü üçün rəqəmsal cihazlar paneli və əsas funksiyaları idarə etmək üçün mərkəzi sensor ekran yerləşdirilib. Sərnişin tərəfdə heç bir əlavə monitor qoyulmayıb. Avtomobilin eksteryeri Formula 1 standartlarında istifadə olunan avtoklav texnologiyası ilə yüksək təzyiq və temperatur altında bərkidilmiş karbon lifli materiallardan əl əməyi ilə hazırlanıb.
Ötən il təqdim edilən və tam elektrikli olacağı düşünülən "Concept C" modelinin təkamül variantı olan bu V8 canavarı Audi-nin performans ruhunu yenidən canlandırmaq üçün doğru zamanda gəlib. Avtomobilin qiyməti rəsmi olaraq açıqlanmasa da modelin cəmi 499 nüsxədə istehsal olunacağı və ilk tədarüklərin 2027-ci ilin ilk yarısında başlayacağı bildirilir.