BAKI, VOA
"Ferrari" şirkəti son zamanlar bəzi mübahisəli qərarlar qəbul etsə də — yeni "Testarossa" və ya ilk tam elektrikli model üzərində işləmək kimi — brendin sadiq müştəriləri hələ də "menyudan kənar" unikal sifarişlər verə bilirlər. Maranellonun fərdi sifarişlər proqramı çərçivəsində hazırlanan yeni HC25 modeli hibrid texnologiyası tətbiq olunmayan orta mühərrikli V8 erasının möhtəşəm son akkordudur.
VOA TheDrive nəşrinə istinadən xəbər verir ki, adı açıqlanmayan xüsusi bir müştəri üçün hazırlanan HC25 modeli "F8 Spider" modelinin şassisi və güc aqreqatı üzərində qurulsa da tamamilə yeni və unikal kuzov dizaynına malikdir. Ferrari Dizayn Studiyası tərəfindən hazırlanan avtomobilin görünüşü brendin ən yeni flaqmanları olan F80 və 12Cilindri modellərindən ilham alıb. Əvvəlki modellərdəki kəskin aerodinamik elementlər bu dəfə daha yumşaq və estetik formalarla əvəz olunub. Avtomobil üçün xüsusi olaraq hazırlanmış ultra-nazik faralar və Ferrari tarixində ilk dəfə tətbiq olunan şaquli gündüz işıqları diqqət çəkir. İki rəngli kuzov "Moonlight Grey" mat boyası və parlaq qara detalların harmoniyası üzərində qurulub.
Məlumdur ki, "Ferrari Amalfi" modelində hələ də V8 mühərriki təklif olunsa da orta mühərrikli seqmentdə F8 modelini əvəz edən 296 GTB artıq hibrid V6-ya keçib. HC25 isə bu ənənəni pozaraq saf yanma mühərrikinə sadiq qalıb. Avtomobil 710 at gücü və 769 Nm fırlanma anı hasil edən 3.9 litrlik ikiqat turboşarjlı V8 mühərriki ilə təchiz edilib. Bu güc aqreqatı avtomobilin sıfırdan saatda 100 kilometr sürətə cəmi 2.9 saniyəyə çatmasına imkan verir.
Avtomobilin daxili dizaynı donor model olan F8 Spider ilə böyük ölçüdə eynidir və reaktiv təyyarə ucluqlarını xatırladan dairəvi hava kanalları qorunub saxlanılıb. Salonun rəng sxemi eksteryerə uyğun olaraq boz-qara rənglərdə işlənib və parlaq sarı detallarla canlandırılıb. Analitiklərin fikrincə HC25 hibridləşmə dövrünə qədəm qoyan Ferrari üçün həm bir vida mesajı, həm də kolleksiyaçılar üçün pultsuz mühərrik səsinin sonuncu nümunəsidir.
