BAKI, VOA

BMW şirkəti məşhur 3 seriyasının tam elektrikli versiyası olan 2027-ci il model i3-ün ilkin nümayişini keçirib. Yeni i3 BMW-nin "Neue Klasse" (Yeni Sinif) adlı yeni elektromobil arxitekturası üzərində qurulan ilk avtomobil olacaq.

VOA xəbər verir ki, avtomobil dizayn baxımından künclərə qədər uzanan və LED işıqlarla əhatələnmiş ənənəvi "qoşa böyrək" radiator barmaqlığı, incə dam sütunları və arxa hissəni tam əhatə edən LED fənər zolağı ilə fərqlənir.

Texniki göstəricilər və performans

Yeni i3 xalis tutumu 108.7 kVt/saat olan litium-ion batareya bloku ilə təchiz edilib. 800 voltluq bu sistem 400 kilovata qədər pik şarj sürətini dəstəkləyir. Maksimal gücü 463 at gücü təşkil edən model 0-100 km/saat sürətlənməsini beş saniyədən az müddətə həyata keçirir.

Uzunluğu 4762 mm, təkər bazası isə 2898 mm olan yeni i3 hazırkı 3 seriyasından daha böyük ölçülərə malikdir. Avtomobil elektrikli sükan idarəetməsi, çoxqollu arxa asqı və iki motorlu tam ötürücü sistemlə (AWD) təklif olunur. Gündəlik sürüşdə mexaniki əyləcləmə ehtiyacını azaldan "soft-stop" (yumşaq dayanma) funksiyası da sistemə inteqrasiya edilib.

Rəqəmsal texnologiyalar

İnteryerdə sürücülərə "Panoramic iDrive" sistemi təqdim olunur. Mərkəzdə 17.9 düymlük sensor ekran, ön şüşənin alt hissəsi boyunca isə xüsusi rəqəmsal displey yerləşdirilib. "BMW Symbiotic Drive" sistemi vasitəsilə 2-ci səviyyəli avtonom idarəetmə təmin edilir. Sistemə edilən yeniliklər simsiz (OTA) şəkildə yüklənə bilər.

2026-cı ilin sonlarında satışa çıxarılması planlaşdırılan 2027-ci il model i3-ün qiymətləri hələ açıqlanmayıb. Baza versiyasının NACS şarj portu və 21 düymədək disklərlə təchiz ediləcəyi bildirilir. Fərqli sükan dizaynına malik "M Sport" paketi və avtomatik parklanma sistemi isə əlavə opsiyalar kimi təklif olunacaq.