BAKI,AzerVoice, Fərid Mikayılov
Qalatasarayın İngiltərə Premyer Liqa təmsilçisi Mançester Sitidən transfer etdiyi türk əsilli alman futbolçu İlkay Gündoğan uşaqlıq arzusunun sarı-qırmızılı formanı geyinərək UEFA Çempionlar Liqasında oynamaq olduğunu bildirib.
AzerVoice xəbər verir ki, 34 yaşlı yarımmüdafiəçi açıqlamasında Qalatasaraya keçidindən duyduğu məmnuniyyəti ifadə edib.
“İlk dəfə bu formanı geyinmək həqiqətən gözəl hissdir. Bu formanı geyinərək uğurlara çatmağa hazıram. Uşaqkən televizorda Qalatasarayın Çempionlar Liqası oyunlarını izləyirdim və həmişə bir gün mənim də qismətim olar deyə xəyal edirdim. O gün, inşallah, tezliklə gələcək”- deyə o vurğulayıb.
Gündoğan Qalatasaray azarkeşlərinə də təşəkkürünü bildirib.
“Mənə göstərdiyiniz sevgiyə görə hamınıza təşəkkür edirəm. Qalatasaray ailəsinin bir parçası olmaq çox xüsusi hissdir. Mövsüm boyu bizi ən yaxşı şəkildə dəstəkləyin”- deyə Gündoğan qeyd edib.
Futbolçu İstanbul təmsilçisi ilə 2 illik müqavilə imzalayıb və yaxın günlərdə Çempionlar Liqasında sarı-qırmızılı forma ilə debüt etməsi gözlənilir.