BAKI,VOA Orxan Qədirzadə

Türkiyənin Malatya vilayətində yerləşən Gündüzbəy içməli su toplama məntəqəsində 31 ildən artıqdır ki, Qurani-Kərim ayələri fasiləsiz səsləndirilir.

Şərqi Anadoluda, Yeşilyurt rayonunda yerləşən bu obyekt Malatya şəhərinin əsas içməli su mənbəyi hesab olunur. 1995-ci ildən etibarən burada günün 24 saatı Qurani-Kərim tilavəti davam etdirilir və bu ənənə su təchizatı prosesinə mənəvi ab-hava qazandırır.

Məntəqəyə Baydağı dağının ətəyindən çıxan təbii bulaq suları ötürülür. Su yalnız milli və beynəlxalq standartlara uyğun xlorlama prosesindən keçirildikdən sonra şəhərin su şəbəkəsinə verilir. Kimyəvi təmizləmə mərhələsinə ehtiyac duyulmur.

Suyun təbii axın (öz təzyiqi) ilə nəql edilməsi onun təbii xüsusiyyətlərinin qorunmasına və enerji sərfiyyatının azalmasına imkan yaradır.

Malatya Böyükşəhər Bələdiyyəsinin sədri Sami Er bildirib ki, Gündüzbəy məntəqəsi təkcə şəhərin mühüm içməli su infrastrukturu deyil, həm də yerli sakinlər üçün xüsusi mənəvi dəyərə malikdir.

Onun sözlərinə görə, Baydağı dağının ətəyindən gələn təbii bulaq suları ən yüksək standartlara uyğun şəkildə xlorlanaraq heç bir əlavə kimyəvi emal aparılmadan su şəbəkəsinə ötürülür. Təbii axın sistemi suyun xüsusiyyətlərini qorumaqla yanaşı, enerji səmərəliliyini də artırır. O qeyd edib ki, obyekt gün ərzində fasiləsiz texniki nəzarətdə saxlanılır.

Bələdiyyə sədri əlavə edib ki, ixtisaslaşmış qruplar suyun keyfiyyətini mütəmadi olaraq yoxlayır, laborator analizlər aparır, eyni zamanda obyektin təmizliyi və texniki xidməti davamlı şəkildə həyata keçirilir. Məqsəd suyun mənbədən vətəndaşların evlərinə qədər təhlükəsiz və sağlam şəkildə çatdırılmasını təmin etməkdir.

Sami Er vurğulayıb ki, 31 ildən artıqdır məntəqədə Qurani-Kərimin fasiləsiz oxunmasının davam etdirilməsi bu obyektin mənəvi əhəmiyyətini daha da artırır və Gündüzbəy stansiyasını həm təbii sərvətləri, həm də dini-mənəvi dəyərləri birləşdirən nümunəyə çevirir.