BAKI,VOA Orxan Qədirzadə

M/V INCE ISTANBUL adlı Türk yük gəmisi Aralıq dənizində batan qayıqlarda ölüm təhlükəsi ilə üzləşən 142 miqrantı xilas edib.

Məlumata görə, İnce Dənizçilik şirkətinə məxsus və kapitan Yakup Aslanın idarə etdiyi gəmi Şərqi Aralıq dənizində üzərkən dənizdə nəzarətsiz şəkildə üzən miqrant qayıqlarını aşkar edib.

Xilasetmə əməliyyatı Dəniz Axtarış və Xilasetmə Koordinasiya Mərkəzinin koordinasiyası ilə həyata keçirilib.

Türk gəmisi açıq dənizdə müxtəlif nöqtələrdə yerləşən ümumilikdə dörd şişmə qayığa müdaxilə edib.

İlk mərhələdə üç qayıqdan 97 nəfər xilas olunub. Daha sonra “Olympia Radio” tərəfindən göndərilən yeni koordinatlar əsasında hərəkət edən gəmi dördüncü qayıqdakı daha 45 nəfəri təhlükəsiz şəkildə göyərtəyə çıxarıb.

Beləliklə, xilas edilən miqrantların ümumi sayı 142 nəfərə çatıb.

Miqrantlar arasında qadın və uşaqların da olduğu bildirilib.

Xilas edilən şəxslər daha sonra Yunanıstan rəsmilərinə təhvil verilib.

İlkin məlumata əsasən, miqrantlar daha yaxşı həyat şəraiti ümidi ilə Afrika ölkələrindən Avropaya getmək üçün yola çıxıblar.