BAKI,VOA, Orxan Qədirzadə

Türkiyədə beynəlxalq hüquqi əməkdaşlıq imkanlarının genişləndirilməsi istiqamətində yeni addım atılıb. Ədliyyə naziri Akın Gürlek 16 yeni məhkəmədə beynəlxalq cinayət işləri üzrə əməkdaşlıq bürolarının yaradıldığını açıqlayıb.

VOA xəbər verir ki, nazir sosial media hesabında paylaşdığı məlumatda bildirib ki, bu addım cinayət işləri üzrə beynəlxalq hüquqi əməkdaşlıq proseslərinin daha sürətli, effektiv və koordinasiyalı həyata keçirilməsi məqsədi daşıyır.

Onun sözlərinə görə, artıq fəaliyyət göstərən 6 belə büroya əlavə olaraq 16 yeni struktur yaradılıb və bununla da ölkə üzrə şəbəkə genişləndirilib. Yeni bürolar Adana, Alanya, Ankara Qərb, Bodrum, Bursa, Dənizli, Diyarbekir, Edirne, Eskişehir, Qaziantep, Kayseri, Konya, Küçükçekmece, Mersin, Samsun və Trabzon şəhərlərində fəaliyyət göstərəcək.

Nazir qeyd edib ki, bu təşəbbüs məhkəmə sistemində ixtisaslaşmanın artırılmasına xidmət edir və 4-cü Məhkəmə İslahatı Strategiyası çərçivəsində həyata keçirilir. Məqsəd sərhədlərarası cinayətlərlə mübarizədə daha effektiv və etibarlı hüquq sistemi formalaşdırmaqdır.