BAKI,VOA, Nailə Babazadə

Türkiyənin vitse-prezidenti Cevdet Yılmaz Qazaxıstanın paytaxtı Astanada keçirilən Dünya Türk İş Şurasının toplantısında iştirak edib.

VOA xəbər verir ki, çıxışı zamanı o, Türkiyə və Qazaxıstan arasındakı ticarət dövriyyəsinin 10 milyard dollara yaxınlaşdığını bildirib.

Vitse-prezident qeyd edib ki, hər iki ölkənin dövlət başçıları tərəfindən müəyyən edilən əsas hədəf ticarət həcmini 15 milyard dollara çatdırmaqdır. O, 2026-cı ilin ilk rübündəki artım tempinin bu hədəfə çatmaq üçün böyük potensial yaratdığını vurğulayıb.

Cevdet Yılmaz həmçinin türk iş adamlarının Qazaxıstana indiyədək 5 milyard dollar birbaşa investisiya qoyduğunu və podratçı şirkətlərin 30 milyard dollar dəyərində 541 layihə icra etdiyini diqqətə çatdırıb. O, Qazaxıstanın Avrasiyanın iqtisadi arxitekturasında mühüm rol oynadığını və hər iki ölkənin qarşılıqlı investisiyaları artırmaqda maraqlı olduğunu deyib. Vitse-prezident Türkiyənin Qazaxıstanın xarici ticarət tərəfdaşları arasında ilk üçlükdə yer alması üçün iş adamlarını daha sıx əməkdaşlığa çağırıb.