BAKI,VOA, Fərid Mikayılov
Türkiyədə narkotik vasitələrin qanunsuz dövriyyəsinə qarşı genişmiqyaslı əməliyyat keçirilib.
VOA xəbər verir ki, Türkiyə Daxili İşlər Nazirliyinin məlumatına əsasən, 71 vilayətdə təşkil edilən əməliyyatlar zamanı 903 şübhəli saxlanılıb, onlardan 373 nəfər barəsində həbs qətimkan tədbiri seçilib.
Bildirilib ki, əməliyyatlar polis orqanları və prokurorluq strukturlarının koordinasiyası ilə həyata keçirilib.
Məlumata görə, son bir həftə ərzində keçirilən tədbirlərdə 2 min 385 əməkdaş, 16 hava vasitəsi və 45 xüsusi təlim keçmiş xidməti it iştirak edib.
Əməliyyatlar zamanı 1 ton 231 kiloqram narkotik maddə və 1 milyon 576 min 660 ədəd psixotrop tərkibli həb müsadirə olunub.
Saxlanılan şəxslərdən 119-u barəsində alternativ qətimkan tədbiri tətbiq olunub, digər şübhəlilər üzrə araşdırmalar davam edir.
Rəsmi qurumlar qeyd edir ki, narkotiklərin yayılmasına qarşı mübarizə ölkə üzrə fasiləsiz şəkildə davam etdiriləcək.