Bakı, VOA, Nailə Babazadə

Türkiyə Statistika Qurumu (TÜİK) 2026-cı ilin fevral ayına dair işçi qüvvəsi göstəricilərini açıqlayıb.

VOA xəbər verir ki, məlumata görə, ölkə üzrə 15 və daha yuxarı yaş qrupunda olan işsizlərin sayı fevralda əvvəlki ayla müqayisədə 133 min nəfər artaraq 2 milyon 981 min nəfərə çatıb. Beləliklə, işsizlik səviyyəsi 0,3 faiz artımla 8,5 faiz təşkil edib. Cinsiyyət bölgüsünə əsasən, işsizlik nisbəti kişilərdə 6,9 faiz, qadınlarda isə 11,6 faiz olaraq müəyyən edilib.

Gənc əhali arasında işsizlik rəqəmlərində daha nəzərəçarpacaq yüksəliş qeydə alınıb. 15-24 yaş qrupunu əhatə edən gənclər arasında işsizlik səviyyəsi əvvəlki ayla müqayisədə 1,4 faiz artaraq 15,8 faizə çatıb. Bu yaş qrupunda işsizlik nisbəti kişilər üçün 12,8 faiz, qadınlar üçün isə 21,8 faiz kimi hesablanıb. Eyni zamanda, mövsümi təsirlərdən arındırılmış məşğul əhalinin sayı 153 min nəfər artaraq 32 milyon 158 min nəfərə yüksəlib, məşğulluq səviyyəsi isə 48,2 faiz olub.

İşçi qüvvəsindəki artım meyli fevral ayında da davam edib. Ölkənin ümumi işçi qüvvəsi 286 min nəfər artaraq 35 milyon 139 min nəfərə ulaşıb, işçi qüvvəsində iştirak səviyyəsi isə 52,6 faiz təşkil edib. Digər tərəfdən, mövsümi və təqvim təsirlərindən arındırılmış həftəlik orta faktiki iş vaxtı dəyişməyərək 42,5 saat qalıb. Qeyri-aktiv işçi qüvvəsi, o cümlədən potensial işçi qüvvəsi və işsizlərdən ibarət olan "atıl işçi qüvvəsi" nisbəti isə fevralda 0,1 faiz artaraq 29,9 faizə yüksəlib.