BAKI, AzerVoice, Orxan Qədirzadə
Malayziyanın Baş naziri Ənvər İbrahim Türkiyə Prezidenti Rəcəb Tayyib Ərdoğanın dəvəti ilə Türkiyəyə rəsmi səfərə gəlib.
Malayziya hökumət başçısını Ankara Esenboğa Hava Limanında Türkiyənin milli müdafiə naziri Yaşar Gülər qarşılayıb.
AzerVoice xəbər verir ki, bu barədə Türkiyə Milli Müdafiə Nazirliyi məlumat yayıb.
Türkiyə Prezident Administrasiyasının Kommunikasiyalar İdarəsinin rəhbəri Burhanəddin Duranın sosial şəbəkə hesabında verdiyi məlumata görə, səfər çərçivəsində 7 yanvar tarixində Türkiyə–Malayziya Yüksək Səviyyəli Strateji Əməkdaşlıq Şurasının ilk iclası keçiriləcək.
Görüş zamanı iki ölkə arasında siyasi, iqtisadi, müdafiə, ticarət və humanitar sahələrdə əməkdaşlığın dərinləşdirilməsi müzakirə olunacaq. Həmçinin Türkiyə ilə Malayziya arasında müqavilə-hüquqi bazanın möhkəmləndirilməsi məqsədilə bir sıra sənədlərin imzalanması nəzərdə tutulur.
Danışıqlarda regional və beynəlxalq gündəlikdə duran məsələlər, İslam dünyasında baş verən proseslər, qlobal təhlükəsizlik və çoxtərəfli əməkdaşlıq mexanizmləri də müzakirə olunacaq.
Rəsmi Ankara səfərin Türkiyə–Malayziya münasibətlərinin strateji tərəfdaşlıq səviyyəsinə yüksəldilməsi baxımından mühüm mərhələ olduğunu bildirir.