BAKI, AzerVoice, Orxan Qədirzadə
Türkiyənin xarici işlər naziri Hakan Fidan 4–5 dekabr tarixlərində Avstriyanın paytaxtı Vyanada keçiriləcək Avropada Təhlükəsizlik və Əməkdaşlıq Təşkilatının (ATƏT) 32-ci Xarici İşlər Nazirləri Şurasının iclasında iştirak edəcək. AzerVoice xəbər verir ki, bu barədə Türkiyə XİN-dəki mənbələr məlumat verib.
Məlumata əsasən, Hakan Fidan Vyana toplantısı çərçivəsində bir sıra dövlətlərin xarici işlər nazirləri ilə ikitərəfli görüşlər keçirəcək. Nazir konfransın birinci günündə başlanğıc plenar iclasında çıxış edəcək.
Fidanın çıxışı zamanı ATƏT-in əsas dəyərlərinə sadiqliyin vacibliyini vurğulayacağı, həmçinin regional gərginliyin artdığı bir dövrdə təşkilatın fəaliyyətinin davamlılığının təmin edilməsinə Ankara tərəfindən dəstəyin bir daha təsdiqlənəcəyi gözlənilir.
Türkiyənin XİN rəhbərinin nitqində Rusiya və Ukrayna arasında ədalətli və davamlı sülhün əldə olunmasına yönələn səylərə dəstəyin ifadə ediləcəyi, diplomatik prosesin qorunmasının vacibliyinin qeyd olunacağı bildirilir. Ankara tərəflər arasında dialoqun təşviqinə hazır olduğunu vurğulayacaq.
Nazir həmçinin İsrailin Yaxın Şərqdəki hərbi əməliyyatlarını və Qəzzada baş verənləri diqqətə çatdıracaq. Türkiyə rəhbərliyinin mövqeyinə uyğun olaraq, çıxışda İsrail–Fələstin münaqişəsinin yalnız iki dövlət əsasında həll oluna biləcəyi vurğulanacaq.
Hakan Fidan çıxışında ATƏT-in Minsk Qrupunun və ona bağlı strukturların ləğvi barədə verilmiş son qərarın əhəmiyyətinə toxunacaq. Qərarın Azərbaycan və Ermənistanın birgə addımları nəticəsində mümkün olduğu xüsusi qeyd olunacaq.
2025-ci ildə ATƏT-ə sədrliyi Finlandiya həyata keçirir. Təşkilat soyuq müharibə dövründə Şərq və Qərb blokları arasında dialoq platforması olaraq yaradılıb.
ATƏT-in əsası 1975-ci ildə imzalanmış Helsinki Yekun Aktı ilə qoyulub, 1994-cü ildə Budapeşt sammitində isə təşkilat indiki adı və daimi qurum statusunu alıb.
2024-cü il dekabrın 6-da Türkiyə nümayəndəsi Feridun Sinirlioğlu ATƏT-in yeni baş katibi seçilib.