BAKI,AzerVoice, Orxan Qədirzadə

Türkiyə və Misir Qəzzədə atəşkəsin möhkəmləndirilməsi və bölgənin gələcək idarəçiliyi ilə bağlı ortaq mesaj verib.

AzerVoice xəbər verir ki, Ankara şəhərində keçirilən Türkiyə–Misir Birgə Planlaşdırma Qrupunun birinci iclası çərçivəsində Xarici işlər naziri Hakan Fidan və Misirin xarici işlər, miqrasiya və xaricdə yaşayan misirlilər naziri Bədir Abdulati birgə mətbuat konfransı keçiriblər.

Nazir Hakan Fidan çıxışında bildirib ki, bölgəyə dair bütün planlar beynəlxalq hüquq və siyasi mexanizm əsasında həyata keçirilməlidir.

“Qəzzə Fələstinin bir hissəsidir, belə də qalmalıdır. Beynəlxalq ictimaiyyət bunu unutmamalıdır.”- nazir deyib.

Fidan, Türkiyənin humanitar yardımının davam etdiyini bildirərək əlavə edərək deyib ki,bu gün Qəzzəyə yardım aparan gəmi Mersin limanından Əl-Ərişə doğru yola çıxıb.

Nazir, yaxın günlərdə Misirin ev sahibliyi edəcəyi Qəzzə Konfransında Türkiyənin fəal iştirak edəcəyini vurğulayıb.

Türkiyə XİN rəhbəri müvəqqəti atəşkəsin qalıcı olması üçün hər iki tərəfin üzərinə məsuliyyət düşdüyünü qeyd edib.

“HƏMAS atəşkəsin davam etməsi üçün müsbət iradə göstərir. İsrail tərəfindən də eyni yanaşma olmalıdır.”-deyə nazir əlavə edib.

Hakan Fidan ABŞ səfərinə də toxunub.

“Prezident Tramp ilə görüşdə Suriya məsələsini, Qəzzə atəşkəsində problemləri necə aradan qaldıra biləcəyimizi və Rusiya–Ukrayna müharibəsinin regiona təsirlərini müzakirə etdik. Verimli görüş oldu.”- nazir əlavə edib.

Misir xarici işlər naziri Bədir Abdulati çıxışında Qahirənin mövqeyini açıq şəkildə ifadə edib.

“Qəzzədə atəşkəsin icrasını dəstəkləmək və növbəti mərhələyə keçid üçün Türkiyə ilə birlikdə hərəkət etməyə hazırıq.”- deyə Misir XİN rəhbəri deyib.

O, eyni zamanda Suriyanın regional sistemə qayıdışına dəstək göstərdiklərini vurğulayıb.

“Suriyanın təhlükəsizliyi və suverenliyinə tam dəstək veririk. Şamın yenidən təsirli aktora çevrilməsini gözləyirik.”- Abdulati deyib.