BAKI,AzerVoice
Milliyyətçi Hərəkat Partiyasının (MHP) sədri Devlet Bahçelinin Türkiyə Böyük Millət Məclisində (TBMM) terror təşkilatı PKK və onun lideri Abdullah Öcalana ünvanladığı tarixi çağırışdan sonra prosesdə diqqətçəkən addımlar atılır.Bahçelinin çıxışının ardından terror təşkilatının başçısı Abdullah Öcalan da bəyanat yayaraq təşkilatın özünü buraxdığını və silahlı mübarizədən imtina etdiyini açıqlamışdı.
Bu qərarın ardınca PKK-nın 12-ci konqresi keçirilib və təşkilat yeni strateji qərarlar qəbul edib.
Məlumata görə, 28 oktyabrda Prezident Rəcəb Tayyib Ərdoğan, “Terrorçusuz Türkiyə” təşəbbüsü çərçivəsində İmralı adasında saxlanılan Abdullah Öcalanla təmasda olan DEM Partiyasının İmralı heyətini qəbul edəcək.
PKK isə konqresdən əvvəl “tarixi addım” atmağa hazırlaşdıqlarını elan etmişdi.
PKK Türkiyədən çəkildiyini bəyan etdi
Terror təşkilatına yaxın mənbələr bildiriblər ki, PKK-nın Türkiyədən çəkilmə qərarını təşkilatın rəhbərlərindən Sabri Ok elan edib.
Açıqlamada deyilir:
“Yaxın Şərqdə davam edən münaqişə və savaşlar həm Türkiyənin, həm də kürd xalqının gələcəyini ciddi şəkildə təhdid etməyə başlayıb. Bu səbəbdən, ötən il Prezident və MHP sədri Devlet Bahçelinin, eləcə də Öndər Abdullah Öcalanın açıqlamaları ilə başlanan və 27 fevral 2025-ci ildə Öcalanın ‘Sülh və Demokratik Cəmiyyət’ çağırışı ilə rəsmi xarakter alan proses, hazırda olduqca mühüm və kritik mərhələdədir.”
PKK açıqlamasında son səkkiz ayda atılan addımlardan da bəhs edib:
“Kürd tərəfi olaraq biz ‘Sülh və Demokratik Cəmiyyət Çağırışı’ əsasında tarixi əhəmiyyət daşıyan addımlar atdıq. Sakit və sağlam müzakirə mühiti yaratmaq məqsədilə 1 mart tarixində atəşkəs elan etdik.
Abdullah Öcalanın yönləndirməsi ilə 5-7 may tarixlərində keçirilən PKK-nın 12-ci Konqresində təşkilatın mövcud strukturunu və silahlı mübarizə strategiyasını bitirmək qərarına gəldik.
Həmçinin bu qərarların yalnız Abdullah Öcalanın birbaşa rəhbərliyi altında həyata keçirilə biləcəyini qeyd etdik.”